विप्लव पनि अब ओलीकै लाइनमा
नेत्रविक्रम चन्द विप्लव नेतृत्वको नेकपा (माओवादी)ले सुशीला कार्की नेतृत्वको सरकार भङ्ग गरी सर्वपक्षीय सरकार गठनको माग गर्दै राष्ट्रपति रामचन्द्र पौडेललाई ज्ञापन पत्र बुझाएको छ ।
विप्लवसहित माओवादी नेताहरूको टोलीले आज शीतल निवास पुगेर ज्ञापन पत्र बुझाएको हो । १३ बुँदे पत्रमा १० दिनभित्र माग पूरा नभए सडक संघर्षमा उत्रिने चेतावनी दिइएको छ ।
कार्की नेतृत्वमा सरकार बन्दै गर्दा आफूहरूले दिएको सुझावलाई बेवास्ता गरिएको र अहिले सोही कारण जनतामा असन्तुष्टि चर्किएको माओवादीको ठहर छ । संविधान पुनर्लेखनको माग गर्दै पत्रमा भनिएको छ, ‘नयाँ संविधान अनुरुपमको राज्य पुनःसंरचना गर्नुपर्छ, र राज्य पुनःसंरचना गर्दा अग्राधिकारसहितको समाजवादी संघीय ढाँचामा गरिनुपर्छ ।’
भदौ २३ र २४ गतेको घटनामा निष्पक्ष छानविनको माग गरेको माओवादीले विभिन्न भ्रष्टाचारका काण्डमाथि अनुसन्धान गर्न उच्चस्तरीय नागरिक आयोगको गठनको माग पनि अघि सारेको छ । शक्तिशाली न्यायालयको गठन मागसहित अघि भनेको छ, ‘गैरकानुनी तरिकाले आर्जन गरेको कालो धनलाई राज्यको माताहत ल्याउन पाँच सय र हजारको नोट खारेज गरी नयाँ नोट प्रचलनमा ल्याउनुपर्छ ।’
विप्लवको यो माग नेकपा एमालेसँग मिलेको छ । एमाले अध्यक्ष केपी ओलीले पनि कार्की नेतृत्वको सरकार फालेर सर्वपक्षीय सरकार बनाउनुपर्नेमा जोड दिँदै आएका छन् ।
Jana Aastha
