चीनले विश्वव्यापी कूरियर पार्सल वृद्धिमा ६० प्रतिशतभन्दा बढी योगदान
बेइजिङ — चीनले १४औँ पञ्चवर्षीय योजनाको अवधि (२०२१–२०२५) मा विश्वव्यापी कूरियर पार्सल वृद्धिको ६० प्रतिशतभन्दा बढी हिस्सा ओगटेको छ। आधिकारिक तथ्यांकअनुसार यस अवधिमा चीनको वार्षिक पार्सल परिमाण झण्डै २०० अर्बमा पुगेको छ।
बुधबार सम्पन्न राष्ट्रिय हुलाक कार्य सम्मेलनमा सार्वजनिक गरिएको तथ्यांकअनुसार सन् २०२५ मा चीनको हुलाक उद्योगको कुल आम्दानी १.८ ट्रिलियन युआन (करिब २५६.५ अर्ब अमेरिकी डलर) पुगेको छ। पञ्चवर्षीय अवधिभर यस क्षेत्रको औसत वार्षिक वृद्धिदर १० प्रतिशतभन्दा बढी रहेको जनाइएको छ।
क्षेत्रको तीव्र विस्तारसँगै प्रति व्यक्ति वार्षिक पार्सल प्रयोग १४१ पुगेको छ। यस अवधिमा दैनिक उच्चतम पार्सल कारोबार ७७७ मिलियन वस्तुसम्म पुगेको थियो।
स्वदेशभित्र रसद पहुँच विस्तारलाई प्राथमिकता दिँदै ई–कमर्स निःशुल्क ढुवानी सेवा सिन्च्याङ र सिजाङ (तिब्बत) लगायत दुर्गम क्षेत्रसम्म विस्तार गरिएको राज्य हुलाक ब्युरोका प्रमुख झाओ चोङजिउले बताए।
केन्द्रीय र पश्चिमी चीनमा कूरियर गतिविधिको हिस्सा उल्लेखनीय रूपमा बढेको छ, जसले ती क्षेत्रलाई राष्ट्रिय बजारसँग अझ मजबुत रूपमा जोड्न सहयोग पुर्याएको झाओको भनाइ छ।
यससँगै उद्योगले उच्च प्रविधियुक्त रूपान्तरण पनि गरेको छ। ठूला वर्गीकरण केन्द्रहरू अधिकांशतः स्वचालित भइसकेका छन् भने ड्रोन र स्वचालित सवारीसाधन नियमित सञ्चालनमा प्रवेश गरिरहेका छन्।
आगामी सन् २०२६ तर्फ हेर्दै ब्युरोले मानवविहीन डेलिभरी प्रविधि र हरित रसद प्रवर्द्धन गर्ने योजना अघि सारेको छ। साथै, विदेशी गोदाम र हवाई कार्गो केन्द्र विस्तारमार्फत अन्तर्राष्ट्रिय सेवा सुदृढ गर्ने प्रतिबद्धता पनि जनाइएको छ।
