अमेरिकाले समुद्री कानून उल्लंघन गरेर रूसी तेल ट्यांकर जफत गर्यो, रूसले सम्पर्क विच्छेदको उजुरी गर्यो
काठमाडौं, पुस २४ – अमेरिकी सेनाले अन्तर्राष्ट्रिय जलमा रूसी झण्डा बोकेको तेल ट्यांकर जहाज ‘एमभी बेला १’ वा ‘मरिनेरा’ जफ्त गरेको छ। अमेरिकी सेनाको युरोपियन कमान (युकम)ले गत बुधबार एक्स (ट्विटर) मार्फत यसको जानकारी दिंदै अमेरिकी प्रतिबन्ध उल्लंघनको आरोपमा जहाज जफ्त गरेको बताएको छ।
यसको प्रतिक्रियामा रूसी परिवहन मन्त्रालयले पनि बुधबारै जहाजसँगको सम्पर्क विच्छेद भएको पुष्टि गर्दै अमेरिकाले समुद्री कानूनको उल्लंघन गरेको आरोप लगाएको छ। अल जजीराको अनुसार, रूसी मन्त्रालयले सार्वजनिक विज्ञप्ति जारी गर्दै भनेको छ, “१९८२ को संयुक्त राष्ट्र समुद्री कानून सम्झौताअनुसार, अन्तर्राष्ट्रिय जलमा नौवहन स्वतन्त्रता लागू हुन्छ र कुनै पनि राष्ट्रले अरू राज्यको अधिकार क्षेत्रमा दर्ता भएको जहाजमा बल प्रयोग गर्ने अधिकार राख्दैन।”
युकमले अल जजीरालाई उद्घृत गर्दै भनेको छ कि जहाजलाई अमेरिकी फेडरल अदालतबाट जारी वारेन्टको आधारमा उत्तर अटलान्टिकमा ट्रयाक गरी जफत गरिएको हो। यस कार्यमा अमेरिकी तटरक्षक जहाज ‘युएससिजिसी मुनरो’ले सहयोग गरेको बताइएको छ। सिन्ह्वा समाचारका अनुसार, ‘मुनरो’ लेजेन्ड-श्रेणीको राष्ट्रिय सुरक्षा कटर हो जुन दूरदराजका उच्चस्तरीय मिसनका लागि डिजाइन गरिएको हो।
रूसी विदेश मन्त्रालयले पनि यस घटनाप्रति गम्भीर रूपमा नजर राख्दै अमेरिकालाई जहाजमा रहेका सबै रूसी नागरिकसँग मानवीय व्यवहार गर्न र तिनलाई शीघ्र रूपमा फर्काउनमा बाधा नपुर्याउन आग्रह गरेको छ। राज्य समाचार एजेन्सी टास्सले उद्धृत गरेको विज्ञप्तिमा यो कुरा उल्लेख छ।
सिन्ह्वाको जानकारीअनुसार, भेनेजुएलामा तेल लोड गर्ने क्रममा अमेरिकी नाकाबन्दीका कारण यो ट्यांकर डक गर्न असमर्थ भएको थियो। गत डिसेम्बरमा अमेरिकी तटरक्षकद्वारा ट्रयाक गरिएपछि यस खाली ट्यांकरले आफ्नो हलमा रूसी झण्डा चित्रण गर्यो, नाम परिवर्तन गर्यो र दर्ता देश पनि रूसमा परिवर्तन गर्यो। अमेरिकी तटबाट करिब ४,००० किलोमिटर टाढा रहेको भनेपनि यो जहाज धेरै दिनदेखि अमेरिकी तटरक्षक जहाजले ट्र्याक गर्दै आएको थियो।
यो घटनाले अन्तर्राष्ट्रिय जलमा समुद्री कानून र प्रतिबन्ध लागू गर्ने अधिकारको बारेमा तनाव बढाएको छ। रूसले अमेरिकी कारबाहीको कडा विरोध गर्दै कूटनीतिक स्तरमा पनि कदम चाल्ने संकेत दिएको छ।
