सेवा क्षेत्र खुल्ला गर्न ९ सहरलाई चुन्याे, विस्तारै खुल्दै चीनकाे अर्थतन्त्र
बेइजिङ, चीन। सेवा क्षेत्रलाई विस्तृत रूपमा खुल्ला बनाउन चीनले नौ सहरमा पायलट परियोजना सुरु गर्न लागेको छ। वाणिज्य मन्त्रालयले शुक्रबार सार्वजनिक गरेको विज्ञप्तिमा यसको घोषणा गरिएको हो।
मन्त्रालयका अनुसार डालियान, निङ्बो, सियामन, छिङ्दाउ, शेन्झेन, हफेई, फुझोउ, शिआन र सुचौ गरी नौवटा सहरले दूरसञ्चार, स्वास्थ्य सेवा र वित्तीय सेवा जस्ता प्रमुख क्षेत्रमा केन्द्रित १५९ पायलट उपायहरू कार्यान्वयन गर्नेछन्।
यी पायलट सहरहरूलाई स्थानीय परिस्थितिका आधारमा भिन्न दृष्टिकोण अवलम्बन गर्न प्रोत्साहित गरिनेछ। उदाहरणका लागि, पूर्वोत्तर एशियाको अन्तर्राष्ट्रिय शिपिङ्ग हबको रूपमा आफ्नो भूमिका निभाउन तटीय सहर डालियानलाई समर्थन गरिनेछ भने उन्नत विनिर्माण र सीमापार व्यापारमा आफ्नो सामर्थ्यलाई मजबूत बनाउन निङ्बोलाई प्रोत्साहित गरिनेछ।
गत वर्ष अप्रिलमा यी नौ सहर पनि चीनको व्यापक पायलट क्षेत्रहरूको सूचीमा सामेल भएका थिए, जसले गर्दा यो कार्यक्रम ११ पूर्व पायलट क्षेत्रहरूभन्दा बाहिर विस्तार भएको हो।
२०१५ मा पायलट कार्यक्रम सुरु भएदेखि नै चीनले नियम, निर्देशन, व्यवस्थापन र मानकहरूका हिसाबले आफ्नो संस्थागत खुल्लापन विस्तार गर्दै आएको छ। साथै यसले बजार-केन्द्रित, कानूनी र अन्तर्राष्ट्रिय व्यापार वातावरण सिर्जना गर्न पनि निरन्तरता कायम राख्दै विदेशी व्यवसायहरूले देशभित्र लगानी र सञ्चालन गर्न सक्ने स्थिर, खुल्ला नीतिगत वातावरण प्रदान गरिरहेको छ।
