सी जिनपिङको अमेरिकी युवा प्रतिनिधिमण्डललाई जवाफ

बेइजिङ — चिनियाँ राष्ट्रपति सी जिनपिङले हालै अमेरिकाबाट चीन भ्रमणमा आएको युवा शिक्षा आदान–प्रदान प्रतिनिधिमण्डलको पत्रको जवाफ दिएका छन्। उक्त प्रतिनिधिमण्डलमा फ्लोरिडाको मियामीस्थित डायमण्ड माइन्ड्स ट्रान्सफर्मेशनल लिडरसिप एकेडेमी, युनिभर्सिटी अफ फ्लोरिडा र मियामी–डेड कलेजका शिक्षक तथा विद्यार्थीहरू सहभागी थिए।

जनवरी ७ मितिको जवाफी पत्रमा राष्ट्रपति सीले ती शिक्षक र विद्यार्थीहरूले चीन भ्रमणलाई सुखद र फलदायी अनुभवका रूपमा लिएको जानकारी पाउँदा आफूलाई खुशी लागेको उल्लेख गरेका छन्। उनले चिनियाँ संस्कृति प्रतिको उनीहरूको गहिरो रुचि र आत्मीय भावनालाई पनि सकारात्मक रूपमा ग्रहण गरेको बताएका छन्।

चीन–अमेरिका सम्बन्धबारे उल्लेख गर्दै सी जिनपिङले दुई देशबीचको सम्बन्धको आशा जनतामा निहित रहेको र यसको भविष्य युवापुस्तामै निर्भर रहेको स्पष्ट पारेका छन्। उनले आफूले अघि सारेको ‘पाँच वर्षमा ५० हजार’ (50,000 in Five Years) पहल सुरु भएयता ४० हजारभन्दा बढी अमेरिकी युवाहरूले सक्रिय सहभागिता जनाइसकेको जानकारी दिँदै यसले उनीहरूलाई वास्तविक चीन बुझ्ने अवसर दिएको र दुवै देशका जनताबीच मित्रताको सेतु निर्माण गरेको बताएका छन्।

यस पहलले चीन र अमेरिकाका जनताबीच मित्रवत आदान–प्रदान र सहकार्य दुवै पक्षको साझा चाहना भएको स्पष्ट रूपमा देखाएको सीको भनाइ छ।

राष्ट्रपति सीले आगामी दिनमा अझ धेरै अमेरिकी युवाहरू चीन–अमेरिका मित्रताको यात्रामा सहभागी हुने अपेक्षा व्यक्त गर्दै उनीहरूलाई दुई देशबीच मित्रताको नयाँ पुस्ताका दूत बन्न र जनस्तरीय आदान–प्रदान सुदृढ गर्दै द्विपक्षीय सम्बन्धको विकासमा योगदान पुर्‍याउन आह्वान गरेका छन्।

यसअघि अमेरिकी प्रतिनिधिमण्डलका शिक्षक र विद्यार्थीहरूले राष्ट्रपति सीलाई पत्र लेख्दै सन २०२५ को अक्टोबरमा गरिएको चीन भ्रमणको अनुभव समेटेका थिए। उनीहरूले ‘पाँच वर्षमा ५० हजार’ पहलप्रति आभार व्यक्त गर्दै यसले दुवै देशका युवाबीच आपसी समझदारी र विश्वास बढाउन महत्वपूर्ण अवसर प्रदान गरेको उल्लेख गरेका छन्।