ट्रम्प र भेनेजुएलाका कार्यवाहक राष्ट्रपति रोड्रिगेजबीच लामो टेलिफोन वार्ता भएको दावी
वाशिङ्टन। अमेरिकी राष्ट्रपति डोनाल्ड ट्रम्पले भेनेजुएलाका कार्यवाहक राष्ट्रपति डेल्सी रोड्रिगेजसँग बुधबार ‘लामो टेलिफोन वार्ता’ भएको र दुई देशबीच सम्बन्ध ‘धेरै राम्रो’ हुँदै गएको दावी गरेका छन्।
ट्रम्पले व्हाइट हाउसमा पत्रकारहरूलाई भने, “आज हामीसँग ठूलो छलफल भयो। उनी एक उत्कृष्ट व्यक्ति हुन्। हामीसँग लामो वार्ता भयो, हामीले धेरै कुरा छलफल गर्यौं र मलाई लाग्छ हामी भेनेजुएलासँग धेरै राम्रोसँग सम्बन्ध बढ्दैछ।”
यस्तै, रोड्रिगेजले पनि बुधबार ट्रम्पसँग ‘लामो, उत्पादक र शिष्ट’ टेलिफोन वार्ता भएको दावी गरिन्। उनले भनिन्, “यस वार्तामा हामीले हाम्रा जनताको हितका लागि द्विपक्षीय कार्य योजना र हाम्रा सरकारबीचको सम्बन्धहरूका विषयमा छलफल गर्यौं।”
ब्लुमबर्गको मंगलबारको खबर अनुसार, अमेरिकी दूतावास फेरि खोल्ने सम्भावना विचार गरिरहेको ट्रम्प प्रशासनको बीचमा रोड्रिगेजले यस हप्ता वाशिङ्टन भ्रमणका लागि आफ्ना प्रतिनिधि, बेलायतमा भेनेजुएलाका राजदूत फेलिक्स प्लासेन्सिया पठाउने योजना बनाएकी छिन्।
भेनेजुएलाका प्रमुख विपक्षी नेत्री मारिया कोरिना माचाडोले पनि त्यही दिन व्हाइट हाउस भ्रमण गर्ने अपेक्षा रहेको छ।
भेनेजुएलाका राष्ट्रपति निकोलस मादुरोलाई जनवरी ३ मा अमेरिकी छापामार शैलीमा जबर्जस्ती लगेर जाने अनि केही दिनपछि, अमेरिकी कूटनीतिज्ञ र सुरक्षा कर्मीहरूको टोलीले काराकास पुगेर अमेरिकी दूतावास फेरि खोल्ने सम्भावनाका बीचमा अमेरिकी सेनाले शुक्रवार भेनेजुएलासँग सम्बन्धित पाँचौं तेल ट्यांकर जफत गरेको छ।
अमेरिकी ऊर्जा सचिव क्रिस राइटले गत हप्ता भनेका थिए कि अमेरिकाले भेनेजुएलामा भण्डारण गरिएको तेल मात्र होइन, त्यस देशबाट उत्पादन हुने तेलको बिक्री पनि अनिश्चित कालसम्म नियन्त्रण गर्नेछ।
