चीन–क्यानडाबीच स्वच्छ ऊर्जा देखि डिजिटल प्रविधिसम्म सहकार्य सुदृढ गर्ने सहमति
बेइजिङ — चीनले क्यानडासँग स्वच्छ ऊर्जा, डिजिटल प्रविधि, आधुनिक कृषि, अन्तरिक्ष विज्ञान, उन्नत उत्पादन तथा वित्तीय क्षेत्रमा सहकार्य सुदृढ गर्न इच्छुक रहेको स्पष्ट पारेको छ। बिहीबार बेइजिङमा क्यानडाका प्रधानमन्त्री मार्क कार्नीसँग भएको द्विपक्षीय वार्ताका क्रममा चिनियाँ प्रधानमन्त्री ली छ्याङले आर्थिक वृद्धिका नयाँ आधारहरू विकास गर्न यी क्षेत्रहरूमा सहकार्यलाई थप विस्तार गर्ने चीनको प्रतिबद्धता व्यक्त गरेका हुन्।
वार्ताका क्रममा प्रधानमन्त्री लीले क्यानडाका थप कम्पनीहरूलाई चीनमा लगानी गर्न स्वागत गर्दै क्यानडामा लगानी गर्ने चिनियाँ उद्यमहरूका लागि निष्पक्ष र भेदभावरहित व्यवसायिक वातावरण सुनिश्चित गर्न क्यानडाले सकारात्मक भूमिका खेल्ने अपेक्षा व्यक्त गरे। दुवै देशबीच पारस्परिक विश्वास र लाभका आधारमा आर्थिक सहकार्य अगाडि बढाउन सकिने उनले उल्लेख गरे।
प्रधानमन्त्री स्तरको वार्तापछि ली छ्याङ र मार्क कार्नीले व्यापार, भन्सार, ऊर्जा, निर्माण, संस्कृति तथा सार्वजनिक सुरक्षा लगायत विभिन्न क्षेत्रमा सहकार्यसम्बन्धी थुप्रै सम्झौता तथा समझदारीपत्रमा हस्ताक्षर भएको प्रक्रियाको साक्षी बने।
यी सम्झौताहरूलाई चीन–क्यानडा सम्बन्धलाई नयाँ गतिमा लैजाने महत्वपूर्ण कदमका रूपमा हेरिएको छ। दुवै पक्षले सहकार्य विस्तारमार्फत आर्थिक विकासलाई थप समावेशी, दिगो र नवप्रवर्तनमुखी बनाउने साझा लक्ष्य दोहोर्याएका छन्।
