संवेदनशील विवादमा सर्वोच्चको असाधारण कदम, तीनै पक्षलाई पर्सि बहसका लागि बोलावट
काठमाडौं — देशको राजनीतिक र संवैधानिक वृत्तमा तरंग ल्याउने एक संवेदनशील विवादमाथि सर्वोच्च अदालतले असाधारण सावधानी अपनाएको छ। विषयको गाम्भीर्यतालाई मध्यनजर गर्दै अदालतले इजलास बसेर कारण देखाऊ आदेश समेत जारी नगरी, मुद्दासँग प्रत्यक्ष सरोकार राख्ने तीनै पक्ष नेपाली कांग्रेस सभापति शेरबहादुर देउवा, महामन्त्री गगन थापा र निर्वाचन आयोगलाई पर्सि हुने बहसका लागि उपस्थित हुन निर्देशन दिएको छ।
अदालतको यो कदमलाई विवादको संवैधानिक महत्व र सम्भावित दूरगामी असरप्रति सचेत दृष्टिकोणका रूपमा हेरिएको छ। प्रस्तुत मुद्दाको टुंगो नलागेसम्म चुनावी प्रक्रिया नै अवरुद्ध हुनसक्ने आशंका बढ्दै गएपछि राजनीतिक वृत्तमा थप अन्योल सिर्जना भएको छ।
यसैबीच, सम्भावित कानुनी र राजनीतिक अनिश्चिततालाई ध्यानमा राख्दै काठमाडौं महानगर प्रमुख बालेन साह र भरतपुर महानगर प्रमुख रेणु दाहालको राजीनामा आजका लागि रोकिएको स्रोतहरूले जनाएका छन्। सर्वोच्च अदालतको आगामी बहस र त्यसपछि आउने दिशानिर्देशले मात्रै यस विवादको मार्गचित्र स्पष्ट गर्ने अपेक्षा गरिएको छ।
राजनीतिक दल, संवैधानिक निकाय र नागरिक समाज सबैको ध्यान अब पर्सिको बहसतर्फ केन्द्रित भएको छ, जहाँबाट मुलुकको चुनावी प्रक्रियामाथि पर्ने प्रभावबारे निर्णायक संकेत आउने विश्वास गरिएको छ।
