ग्वाटेमालामा सङ्कटकालीन अवस्था: पुलिसमाथि संगठित हमला, ७ जना शहीद
ग्वाटेमाला सिटी, – देशभरि राष्ट्रिय नागरिक पुलिसमाथि भएको संगठित हमलाको लहरपछि ग्वाटेमालाका राष्ट्रपति बर्नार्डो अरेभालोले ३० दिनको लागि राष्ट्रव्यापी सङ्कटकालीन अवस्था (स्टेट अफ सिज) घोषणा गरेका छन्। यस हमलामा कम्तीमा सात जना पुलिस अधिकारीहरूको मृत्यु भएको प्राधिकारीहरूले आइतबार सार्वजनिक गरे।
हिंसाको प्रकोप तीनवटा कारागारहरूमा भएको दंगासँग सम्बन्धित छ, जहाँ ग्याङ्ग सदस्यहरूले ४६ जनालाई बन्धक बनाएका थिए। राष्ट्रपति अरेभालोले सुरक्षा बलहरूले यी तीनवटै जेलहरूमा पुनः नियन्त्रण कायम गरेको पुष्टि गर्दै आपतकालीन उपाय अपराधी गिरोहहरू विरुद्ध राज्य कारबाही बलियो बनाउन र सार्वजनिक सुरक्षा सुनिश्चित गर्ने उद्देश्य रहेको बताए।
शहीद भएका अधिकारीहरूको सम्मानमा राष्ट्रपतिले तीन दिने राष्ट्रिय शोक घोषणा गरेका छन्। गृहमन्त्री मार्को एन्टोनियो भिलेडाले हमलाहरू कारागार भित्रको उपद्रवसँग जोडिएको बताउँदै सुरक्षा बलहरू उच्च सतर्कतामा रहेको जानकारी दिए।
ग्वाटेमाला सरकारले एक बिज्ञप्तिमा यस हिंसालाई राज्य कारबाहीको प्रतिशोधात्मक जवाफी कारबाही भनी उल्लेख गर्दै प्राधिकारीहरू “आतंककारीहरूसँग झुक्दैनन् वा कुनै सम्झौता गर्दैनन्” भनेर जोड दिएको छ।
राष्ट्रपति अरेभालोले जनताको सुरक्षा र सार्वजनिक शान्ति कायम राख्न राष्ट्रिय नागरिक पुलिस र सेना देशभरि तैनाथ रहने बताएका छन्। यस घटनाले ग्वाटेमालामा अपराधी गिरोहहरूको सङ्गठित शक्ति र राज्यसँगको टक्करको गम्भीर रूप देखाएको छ।
ग्वाटेमालामा सङ्गठित अपराध र गिरोह हिंसा दीर्घकालीन समस्या रहेको छ। राष्ट्रपति अरेभालो, जो गत वर्ष नाेभेम्बरमा कार्यभार सम्हालेका हुन्, उनी सुधारवादी एजेन्डाका साथ सत्तामा आएका थिए। तर यस हालको हिंसाको लहरले उनको सुरक्षा र शान्ति स्थापित गर्ने प्रयासलाई ठूलो चुनौती दिएको छ। देशभरि सुरक्षा बलहरूको तैनाथी बढाइएको छ भने आगामी दिनहरूमा स्थिति कस्तो रूप लिन्छ, त्यो नै हाल ग्वाटेमालाको लागि सबैभन्दा ठूलो प्रश्न बनेको छ।
