बेलायतको जहाज अवरोध योजनामा रुसको चेतावनी, कडा जवाफ दिने संकेत
काठमाडौं । बेलायतले प्रतिबन्धित जहाजहरू नियन्त्रणमा लिने र अवरोध गर्ने तयारी गरेपछि रुसले त्यसको कडा जवाफ दिने चेतावनी दिएको छ। बेलायतका लागि रुसी राजदूत आन्द्रेइ केलिनले रुसी सञ्चारमाध्यम इजभेस्तियालाई दिएको अन्तर्वार्तामा बेलायतको योजनाप्रति गम्भीर आपत्ति जनाउँदै आवश्यक प्रतिकार गरिने स्पष्ट पारेका हुन्।
केलिनका अनुसार रुसी तेल ट्यांकरहरू अब सुरक्षा जहाजको साथमा सञ्चालन गरिनेछ, साथै केही समुद्री क्षेत्रहरूलाई अस्थायी रूपमा जहाज आवागमनका लागि बन्द गर्न सकिने विकल्प पनि खुला राखिएको छ। उनका अनुसार यो कदम रुसी जहाजहरूको सुरक्षाका लागि आवश्यक सावधानी हो।
यसअघि बेलायती सरकारले प्रतिबन्धको दायरामा परेका जहाजहरू नियन्त्रणमा लिन कानुनी आधार तयार गरिसकेको खबर सार्वजनिक भएको थियो। यसले अन्तर्राष्ट्रिय समुद्री आवागमन र कूटनीतिक सम्बन्धमा नयाँ तनाव थप्ने संकेत गरेको विश्लेषकहरू बताउँछन्।
विश्लेषकहरूका अनुसार बेलायत एक्लै यस्ता कदम चाल्न सक्षम नहुन सक्छ र अन्य देशहरूसँग संयुक्त अपरेसनमा जानुपर्ने अवस्था आउन सक्छ। अर्कोतर्फ, रुससँग सम्भावित आक्रमण रोक्ने र प्रभावकारी जवाफ दिने पर्याप्त क्षमता रहेको उनीहरूको मूल्याङ्कन छ।
केलिनले बेलायतको पछिल्लो नीतिगत कडाइको मुख्य उद्देश्य युक्रेन द्वन्द्व समाधानका लागि सुरु हुन सक्ने नयाँ वार्तालाई अवरुद्ध गर्नु रहेको दाबी गरेका छन्। उनका शब्दमा, “यो अन्तर्राष्ट्रिय अस्थिरता जानाजान बढाउने प्रयास हो, जसको असर अन्तर्राष्ट्रिय कानुन र विश्व व्यापारमा गम्भीर रूपमा पर्न सक्छ।”
यसको परिणामस्वरूप कच्चा पदार्थ र उपभोग्य वस्तुको मूल्य बढ्न सक्ने, जहाज बीमाको लागत महँगिन सक्ने तथा समुद्रमा सुरक्षा जहाजहरूको उपस्थिति बढ्ने सम्भावना रहेको उनले चेतावनी दिएका छन्।
