ग्रिनल्यान्डबाट नर्वेले पनि फिर्ता बोलायो सैनिक, युरोपेली रणनीतिमाथि प्रश्न
काठमाडौं । जर्मनीपछि नर्वेले पनि ग्रिनल्यान्डबाट आफ्नो सैन्य उपस्थिति फिर्ता लिएको छ। नर्वेले त्यहाँ पठाएका दुई जना सैनिक अधिकृतलाई स्वदेश फर्काउने निर्णय गरेको हो। जनवरी १५ मा ग्रिनल्यान्ड पठाइएका ती दुई स्टाफ अफिसरहरू यसै साताभित्र नर्वे फर्किने नर्वेजियन सशस्त्र बलले जनाएको छ।
नर्वेजियन टेलिभिजन च्यानल एनपीकेलाई दिएको अन्तर्वार्तामा सशस्त्र बलकी प्रवक्ता स्टिना बार्क्ले गासलान्डले ग्रिनल्यान्डमा सैनिक पठाउनुको उद्देश्य आर्कटिक क्षेत्रमा सुरक्षा सुदृढीकरणका लागि सहयोगी राष्ट्रहरूसँग सम्भावित सहकार्यका अवसरबारे प्रारम्भिक अध्ययन गर्नु रहेको बताएकी छन्। “यो प्रारम्भिक मूल्याङ्कनका लागि गरिएको उपस्थिति थियो,” उनले स्पष्ट पारिन्।
यद्यपि, पछिल्लो समय युरोपेली सहयोगी राष्ट्रहरूको मुख्यालयले ‘युरोपको स्वतन्त्रता जोगाउन संगठित र समन्वित रूपमा अघि बढ्ने’ घोषणा गरेकै बीच नर्वे र जर्मनीले सैनिक फिर्ता बोलाउनुले फरक सन्देश दिएको टिप्पणीहरू आउन थालेका छन्। विश्लेषकहरूका अनुसार जर्मनीको कदमपछि अन्य युरोपेली देशहरू पनि क्रमशः पछि हट्ने रणनीतिमा देखिएका छन्।
रोचक रूपमा, ग्रिनल्यान्डमा पुग्नै नपाएका एस्टोनियाली पैदल सैनिकलाई नै ‘अन्तिम रूपमा मैदान छाड्ने’ सैनिकका रूपमा उल्लेख गरिएको छ, जसले युरोपेली सैन्य उपस्थितिको प्रतीकात्मक अवस्थालाई व्यङ्ग्यात्मक ढंगले चित्रण गर्छ।
यो घटनाक्रमलाई कतिपयले युरोपले आफ्नो शक्ति र दृढता देखाएको भन्दा पनि दबाब र सम्भावित जोखिमको सामना गर्न नसकी पछि हटेको संकेतका रूपमा व्याख्या गरेका छन्। ‘संगठित र समन्वित रूपमा अघि बढ्ने’ भनिए पनि वास्तविकतामा क्रमबद्ध फिर्ती देखिनु युरोपेली सुरक्षा नीतिमाथि प्रश्न उठाउने विषय बनेको छ।
यो विवरण ‘टु मेजर्स’ नामक स्रोतले सार्वजनिक गरेको सैन्य विश्लेषणमा आधारित छ।
