केन्द्रीय अफ्रिकी गणतन्त्रमा पुनः टोउएडेराको विजय, तेस्रो कार्यकालको लागि निर्वाचित
बान्गुई, जनवरी २० । केन्द्रीय अफ्रिकी गणतन्त्रको संवैधानिक परिषदले सोमबार २०२५ डिसेम्बर २८ को राष्ट्रपति निर्वाचनको अन्तिम नतिजा घोषणा गर्दै पदस्थ राष्ट्रपति फाउस्टिन-आर्चेन्ज टोउएडेरा पुनः निर्वाचित भएको घोषणा गरेको छ।
संवैधानिक परिषदले राजधानी बान्गुईमा आयोजित एक आधिकारिक समारोहमा टोउएडेराले ७७.९० प्रतिशत मत हासिल गरेको घोषणा गर्दै उनले सात वर्षे कार्यकाल लिने जानकारी दिएको हो।
देशको निर्वाचन प्राधिकरण, राष्ट्रिय निर्वाचन प्राधिकरणले जारी गरेको अन्तरिम नतिजा अनुसार राष्ट्रपति निर्वाचनमा अन्य प्रतिस्पर्धीहरू भूतपूर्व प्रधानमन्त्री एनिसेट-जोर्जेस डोलोगुले र हेनरी-मारी डोन्ड्रा क्रमशः दोस्रो र तेस्रो स्थानमा रहेका छन्।
राष्ट्रिय निर्वाचन प्राधिकरणका अनुसार यस निर्वाचनमा लगभग २३ लाख मतदाता दर्ता भएका थिए। अवलोकनकर्ताहरूले निर्वाचन “मुख्यतः शान्तिपूर्ण” भएको बताएका छन्।
अन्तिम नतिजा घोषणा भएको केही समयपछि टोउएडेराले बान्गुईमा आफ्ना समर्थकहरूसँग र्याली गरे। उनले आफ्ना समर्थकहरूलाई धन्यवाद दिंदै देशको पुनर्निर्माणका लागि अन्य उम्मेदवारहरूसँग एकताको आह्वान गरे।
६८ वर्षीय टोउएडेराले आफ्नो अभियान शान्ति पुनर्स्थापना र राष्ट्रिय विकास बढाउनमा केन्द्रित गरेका थिए। निर्वाचन अगाडि उनले केही प्रमुख विद्रोही समूहहरूसँग शान्ति सम्झौतामा हस्ताक्षर गरेका थिए।
२०१६ देखि पदमा रहेका टोउएडेरा यस जितपछि राष्ट्रपतिको रूपमा आफ्नो तेस्रो कार्यकाल सुरु गर्नेछन्।
मतदाताहरूले २०२५ डिसेम्बर २८ मा केन्द्रीय अफ्रिकी गणतन्त्रको व्यवस्थापिका, क्षेत्रीय र नगरपालिका निर्वाचनमा पनि मतदान गरेका थिए।
