बाँके–३ मा नेकपा उम्मेदवारी विवाद, दीपक जी.एम.पछि कान्तुराम गौतमको टिकट भेटिएपछि अन्योल
बाँके । प्रतिनिधि सभा निर्वाचनअन्तर्गत बाँके क्षेत्र नम्बर ३ मा नेपाली कम्युनिष्ट पार्टी (नेकपा) भित्र उम्मेदवारीको विषयलाई लिएर विवाद देखिएको छ। नेकपाको तर्फबाट दीपक जी.एम.ले प्रतिनिधि सभा सदस्यका लागि औपचारिक रूपमा उम्मेदवारी दर्ता गरिसकेपछि पुनः कान्तुराम गौतमको नाममा जारी गरिएको आधिकारिक टिकट फेला परेपछि राजनीतिक वृत्तमा अन्योल पैदा भएको हो।
स्रोतका अनुसार कान्तुराम गौतमले पनि सोही क्षेत्रबाट उम्मेदवारी दर्ता गरेको दाबी गरिएको छ। सार्वजनिक भएको कागजातमा प्रतिनिधि सभा सदस्य निर्वाचनका लागि नेकपाको आधिकारिक उम्मेदवारका रूपमा कान्तुराम गौतमको नाम उल्लेख गरिएको देखिन्छ, जसले पार्टीको आधिकारिक निर्णय र उम्मेदवारी प्रक्रियामाथि प्रश्न उठाएको छ।
एकै क्षेत्रबाट एउटै दलका दुई जनाको नाममा टिकट र उम्मेदवारी दर्ता भएको खबर बाहिरिएपछि निर्वाचन आयोग, स्थानीय प्रशासन तथा पार्टी नेतृत्वको ध्यानाकर्षण भएको छ। यस घटनाले बाँके–३ मा नेकपाको आन्तरिक समन्वय कमजोर भएको संकेत गरेको राजनीतिक विश्लेषकहरूको टिप्पणी छ।
यस विषयमा नेकपाको केन्द्रीय नेतृत्वबाट औपचारिक धारणा आउन बाँकी छ। यद्यपि समयमै स्पष्ट निर्णय नआए निर्वाचन प्रक्रियामै असर पर्ने र मतदातामा भ्रम सिर्जना हुने सम्भावना बढेको देखिन्छ।
