ताइवान जलडमरूको तनाव बढाउने काम अलोकप्रिय र जनभावनाविपरीत : चिनियाँ अधिकारी
बेइजिङ । चीनको राज्य परिषद अन्तर्गत रहेको ताइवान मामिला कार्यालयका प्रवक्ता पेंग छिङएनले ताइवानका लाइ छिङते नेतृत्वको प्रशासनले तथाकथित ‘मुख्यभूमि चीनबाटको खतरा’लाई बारम्बार अतिरञ्जित गर्दै आएको आरोप लगाएका छन्। यसले ताइवान जलडमरूबीचको सम्बन्धमा अनावश्यक टकराव र वैमनस्यता बढाइरहेको उनको टिप्पणी छ।
बुधबार आयोजित नियमित पत्रकार सम्मेलनमा बोल्दै प्रवक्ता पेंगले यस्तो प्रवृत्ति ताइवान टापुमा विद्यमान मुख्यधारको जनमतविरुद्ध रहेको स्पष्ट पारे। उनका अनुसार ताइवानका अधिकांश नागरिक शान्ति, विकास, आपसी आदान–प्रदान र सहकार्यको पक्षमा छन्। तर, वर्तमान प्रशासनका कदमहरूले यही जनइच्छालाई बेवास्ता गर्दै तनावलाई उक्साउने काम गरिरहेको उनले बताए।
पेंगले भने, “शान्ति र सहकार्य चाहने जनभावनाको विपरीत गरिने यस्ता गतिविधि अलोकप्रिय हुन्छन् र अन्ततः जनस्तरबाटै विरोधको सामना गर्न बाध्य हुन्छन्।”
उनले यो प्रतिक्रिया ताइवानमा हालै सार्वजनिक भएको एउटा मुद्दासँग जोडेर दिएका हुन्। उक्त घटनामा ताइवानस्थित एक एयरलाइन्समा कार्यरत छ्याओ थरका एक व्यक्ति स्थानीय अदालतबाट घुस प्रकरणमा दोषी ठहर भई छ महिनाको कैद सजाय सुनाइएको छ। अदालतका अनुसार ती व्यक्तिले चीनको मुख्यभूमिस्थित गुप्तचर निकायको तर्फबाट काम गर्दै ताइवानको मुख्यभूमि मामिला परिषदका एक अधिकारीबाट अनुसन्धान परियोजनासम्बन्धी गोप्य जानकारी प्राप्त गर्ने प्रयास गरेका थिए।
प्रवक्ता पेंगले यस्तो घटनालाई आधार बनाएर सम्पूर्ण ताइवान–मुख्यभूमि सम्बन्धलाई ‘खतराको चश्माबाट’ हेर्ने प्रवृत्ति गलत रहेको संकेत गरे। उनले द्वन्द्व र अविश्वास होइन, संवाद र सहकार्य नै दुवै पक्षका जनताका साझा हितमा रहेको दोहोर्याए।
चिनियाँ पक्षको यो धारणा पछिल्लो समय ताइवान जलडमरू क्षेत्रमा बढ्दै गएको राजनीतिक तनाव र कूटनीतिक बयानबाजीको सन्दर्भमा महत्वपूर्ण मानिएको छ।
