रुस–प्यालेस्टाइन उच्चस्तरीय वार्ता मस्कोमा सुरु
मस्को । रुस र प्यालेस्टाइनबीच उच्चस्तरीय कूटनीतिक वार्ता मस्कोमा औपचारिक रूपमा सुरु भएको छ। रुसका राष्ट्रपति भ्लादिमिर पुटिन र प्यालेस्टाइन राज्यका राष्ट्रपति महमुद अब्बासबीच मस्कोस्थित क्रेमलिनमा भेटवार्ता भएको हो।
भेटका क्रममा दुवै नेताबीच मध्यपूर्वको पछिल्लो राजनीतिक अवस्था, गाजामा जारी मानवीय संकट, प्यालेस्टाइनी जनताको अधिकार तथा क्षेत्रीय शान्ति प्रक्रियाबारे विस्तृत छलफल भएको बताइएको छ। राष्ट्रपति पुटिनले अन्तर्राष्ट्रिय कानुन, संयुक्त राष्ट्रसंघका प्रस्ताव र द्विराष्ट्र समाधानको सिद्धान्तप्रति रुसको प्रतिबद्धता दोहोर्याउनुभएको छ।
राष्ट्रपति अब्बासले प्यालेस्टाइनले भोग्दै आएको वर्तमान कठिन परिस्थिति, नागरिकमाथि बढ्दो दबाब र शान्ति स्थापना गर्न अन्तर्राष्ट्रिय समुदायको सक्रिय भूमिकाको आवश्यकता औँल्याउनुभएको जनाइएको छ।
यो भेटवार्तालाई वर्तमान अन्तर्राष्ट्रिय परिस्थितिमा रुस–प्यालेस्टाइन सम्बन्ध थप सुदृढ बनाउने तथा मध्यपूर्व शान्ति प्रक्रियामा रुसको कूटनीतिक सक्रियतालाई थप स्पष्ट गर्ने महत्वपूर्ण घटनाका रूपमा हेरिएको छ।
