चीनको सैन्य आधुनिकीकरणतर्फ अर्को निर्णायक कदम

बेइजिङ — चीनले आफ्नो सैन्य शक्ति र रणनीतिक सोचलाई आधुनिक युगअनुकूल बनाउने लक्ष्यसहित महत्वपूर्ण नीतिगत कदम चालेको छ। केन्द्रीय सैन्य आयोगका अध्यक्ष सी चिनफिङले सैन्य सिद्धान्त सम्बन्धी कामलाई व्यवस्थित र प्रभावकारी बनाउने उद्देश्यले नयाँ नियमावली जारी गर्न आदेश दिएका छन्। उक्त नियमावली आगामी मार्च १ देखि औपचारिक रूपमा लागू हुनेछ।

नयाँ नियमावलीले सैन्य सिद्धान्तको आधुनिकीकरणलाई तीव्रता दिनुका साथै त्यसमा नवप्रवर्तनलाई संस्थागत गर्ने शीर्षस्तरीय ढाँचालाई सुदृढ बनाउनेमा जोड दिएको छ। सैन्य सिद्धान्त अनुसन्धानको मोडेल सुधार, दीर्घकालीन रणनीतिक सोच विकास र व्यवहारमा प्रयोगयोग्य सिद्धान्त निर्माण यसका प्रमुख लक्ष्य हुन्।

यस नियमावली मार्फत सैन्य सिद्धान्तसम्बन्धी कामको व्यवस्थापन प्रणालीलाई स्पष्ट र मानकीकृत गरिएको छ। सैन्य सिद्धान्त विकास रणनीति, विकास योजना तथा वार्षिक योजनाका मुख्य विषयवस्तु, संकलन प्रक्रिया र सार्वजनिक गर्ने विधि स्पष्ट रूपमा तोकिएको छ। साथै, सैन्य सिद्धान्तबाट प्राप्त उपलब्धिहरूको दर्ता र साझा प्रयोग, मूल्याङ्कन तथा मान्यता, प्रवर्द्धन र प्रयोग, तथा पछिल्लो मूल्याङ्कन (रेट्रोस्पेक्टिभ एसेस्मेन्ट) का मापदण्ड र आवश्यकतासमेत निर्धारण गरिएको छ।

सात अध्याय र ५२ धारामा समेटिएको यो नियमावलीले चीनको रक्षा नीति र सैन्य अभ्यासलाई दीर्घकालीन रूपमा मार्गदर्शन गर्ने अपेक्षा गरिएको छ। विश्लेषकहरूका अनुसार, यस कदमले चीनको सैन्य सोचलाई व्यवस्थित, वैज्ञानिक र नवप्रवर्तनमुखी बनाउँदै विश्वस्तरको आधुनिक सेनाको लक्ष्यतर्फ थप अघि बढाउने संकेत गर्छ।

समग्रमा, नयाँ नियमावली चीनको सैन्य संरचना मात्र होइन, रणनीतिक चिन्तन र सिद्धान्त निर्माण प्रक्रियालाई पनि नयाँ उचाइमा पुर्‍याउने प्रयासका रूपमा हेरिएको छ।