लेबनानमा बढ्दो मानवीय क्षति: ३५ दिनमा एक हजार दुई सयभन्दा बढीको मृत्यु, ३५ हजार परिवार विस्थापित

काठमाडौं — लेबनानको प्रधानमन्त्री कार्यालयअन्तर्गतको विपद् जोखिम व्यवस्थापन इकाइका अनुसार आइतबार मात्र ४९ जनाको मृत्यु र ११६ जना घाइते भएका छन्। मार्च २ मा सुरु भएको हिंसाको नयाँ चरणमा हालसम्म मृत्यु हुनेको सङ्ख्या एक हजार दुई सय ३८ पुगेको छ भने घाइते हुनेको सङ्ख्या तीन हजार पाँच सय ४३ पुगेको छ।

इकाइले आइतबार सार्वजनिक गरेको दैनिक प्रतिवेदनअनुसार हालसम्म चार हजार चार सय एक शत्रुतापूर्ण घटनाहरू रेकर्ड भइसकेका छन्। देशभरका ६६३ वटा आश्रयस्थलहरूमा एक लाख ३६ हजार एक सय ४७ विस्थापित व्यक्तिहरू र ३५ हजार एक सय ७० परिवारहरू रहेका छन्।

विस्थापित र मृतकको सङ्ख्या निरन्तर वृद्धि हुँदै गएकाले इकाइले मानवीय अवस्थाको अनुगमन र सम्बन्धित निकायहरूसँग समन्वय जारी राखेको जनाएको छ।

इजरायली युद्धक विमानहरूले दक्षिणी लेबनानका धेरै क्षेत्रहरूमा हवाई आक्रमण जारी राखेका छन्। इजरायली सेनाले दाहिये क्षेत्रलाई लक्षित गर्ने चेतावनी दिँदै बेरुतको दक्षिणी उपनगरका बासिन्दाहरूलाई सुरक्षित स्थानमा सर्न आग्रह गरेको छ।

मार्च २ मा हिजबुल्लाहले २०२४ नोभेम्बर २७ को युद्धविरामपछि पहिलो पटक इजरायलतर्फ रकेट प्रहार गरेपछि सीमापार द्वन्द्व सुरु भएको थियो। सो घटनापछि इजरायलले दक्षिणी र पूर्वी लेबनानभर हवाई आक्रमण तीव्र पारेको थियो। निरन्तर हिंसाले लेबनानमा मानवीय सङ्कट गहिरिँदै गएको छ भने अन्तर्राष्ट्रिय समुदायले युद्धविराम र शान्तिपूर्ण समाधानका लागि दबाब बढाइरहेको छ।