गृहमन्त्री गुरुङद्वारा प्रहरी प्रधान कार्यालय निरीक्षण: ‘बोली, व्यवहार सुधार्नू, मोडलको रूपमा विकास गर्छौं’
काठमाडौँ — गृहमन्त्री सुधन गुरुङले सोमबार प्रहरी प्रधान कार्यालय, नक्सालको निरीक्षण गर्दै प्रहरीको बोली, व्यवहार र सेवा प्रवाहमा सुधार गर्न निर्देशन दिएका छन्। उनले प्रहरीलाई ‘मोडल’को रूपमा विकास गर्ने आफ्नो लक्ष्य रहेको स्पष्ट पार्दै भौतिक पूर्वाधार, प्रविधि र कर्मचारीको दैनिक आवश्यकतादेखि अनुसन्धानको गुणस्तरसम्ममा सुधारको खाका प्रस्तुत गरे।
प्रहरी प्रधान कार्यालयस्थित डिजिटल फरेन्सिक ल्याब, अपराध अनुसन्धान विभाग लगायत विभिन्न निकायको अवलोकन गरेपछि गृहमन्त्री गुरुङले प्रहरी उच्च अधिकृतहरूलाई सम्बोधन गर्दै भने, “प्रहरीको रासन सुधारदेखि अनुसन्धानका लागि अत्याधुनिक प्रविधि ल्याउने काम हाम्रो हो। तपाईंहरू काम गरेर देखाउनुस्।”
गृहमन्त्री गुरुङले प्रहरी कर्मचारीहरूको बोली र व्यवहारमा विशेष ध्यान दिन निर्देशन दिँदै सर्वसाधारणसँगको प्रहरीको व्यवहार नै संस्थाप्रतिको विश्वासको आधार भएको बताए। उनले भने, “प्रहरीलाई मोडलको रूपमा विकास गर्ने हाम्रो लक्ष्य हो। यसका लागि तपाईंहरूको आचरण, सेवा शैली र अनुशासन सबैभन्दा महत्वपूर्ण छन्।”
उनले प्रहरीका लागि आवश्यक कपडाको उद्योगसमेत आफैं खोलेर गुणस्तरीय उत्पादन गर्नुपर्ने धारणा राख्दै अन्य आवश्यक स्रोत र साधनहरू पनि स्तरीय हुनुपर्नेमा जोड दिए। गृहमन्त्रीको यो भनाइले प्रहरीको भौतिक सुविधा र आपूर्ति व्यवस्थापनमा दीर्घकालीन सुधारको खोजी गर्ने सरकारको तयारी देखिन्छ।
प्रहरी प्रधान कार्यालयको निरीक्षणका क्रममा गृहमन्त्री गुरुङले अनुसन्धानका लागि आवश्यक प्रविधि, पूर्वाधार र जनशक्ति व्यवस्थापनबारे समेत प्रहरी अधिकृतहरूसँग छलफल गरेका थिए। उनले अपराध अनुसन्धानलाई थप प्रभावकारी, वैज्ञानिक र पारदर्शी बनाउन आवश्यक सहयोग गर्ने प्रतिबद्धता समेत व्यक्त गरे।
गृहमन्त्रीको यो निरीक्षण र निर्देशनपछि प्रहरी प्रशासनमा आन्तरिक सुधारका कार्यक्रमहरू तीव्र हुने अपेक्षा गरिएको छ। प्रहरी अधिकृतहरूले पनि गृहमन्त्रीले दिएको निर्देशनलाई आत्मसात् गर्दै सेवा प्रवाह र अनुसन्धानको गुणस्तरमा सुधारका लागि थप सक्रियता देखाउने प्रतिबद्धता जनाएका छन्।
