‘चीन सैन्य खतरा’को अतिरञ्जना बन्द गर्न अमेरिकालाई बेइजिङको कडा आग्रह

बेइजिङ । चीनले संयुक्त राज्य अमेरिकालाई चीनप्रति वस्तुगत, तर्कसंगत र यथार्थपरक दृष्टिकोण अपनाउन आग्रह गर्दै तथाकथित ‘चीन सैन्य खतरा’को प्रचार बन्द गर्न आह्वान गरेको छ। चिनियाँ राष्ट्रिय रक्षा मन्त्रालयका प्रवक्ता जियाङ बिनले बिहीबार अमेरिकी सञ्चारमाध्यमको जिज्ञासामा प्रतिक्रिया जनाउँदै यो धारणा व्यक्त गरेका हुन्।

यो प्रतिक्रिया अमेरिकाले हालै सार्वजनिक गरेको २०२६ राष्ट्रिय रक्षा रणनीतिसँग सम्बन्धित छ। अमेरिकी रक्षा मन्त्रालयद्वारा जारी उक्त दस्तावेजमा एशिया–प्रशान्त क्षेत्रमा चीनलाई प्रतिरोध र नियन्त्रण गर्ने नीति अपनाइने, तर प्रत्यक्ष टकराव होइन ‘शक्तिको माध्यमबाट रोकथाम’ गरिने उल्लेख छ। साथै, रणनीतिक स्थिरता कायम राख्न र ‘सम्मानजनक शान्ति’ सम्भव बनाउन चिनियाँ जनमुक्ति सेनासँग सैन्य–सैन्य संवादको दायरा विस्तार गरिने भनिएको छ।

उक्त रणनीतिमा अमेरिकाले ‘पहिलो टापु शृंखला’ (First Island Chain) वरिपरि बलियो प्रतिरोधात्मक रक्षा संरचना खडा गर्ने योजना समेत समेटिएको छ, जसलाई चीनले आफ्नो सुरक्षा र रणनीतिक हितविरुद्ध लक्षित कदमका रूपमा हेरेको छ।

प्रवक्ता जियाङ बिनले प्रतिक्रिया दिँदै भने, “तथ्यहरूले प्रमाणित गरिसकेका छन्—चीनलाई नियन्त्रण गर्ने वा अवरुद्ध गर्ने कुनै पनि प्रयास अन्ततः असफल हुने निश्चित छ।” उनका अनुसार पारस्परिक सम्मान, शान्तिपूर्ण सहअस्तित्व र सहकार्यमा आधारित ‘विन–विन’ सिद्धान्त नै चीन र अमेरिकाबीच सम्बन्ध व्यवस्थापनको सही बाटो हो।

जियाङले चीन आफ्नो सार्वभौमिकता, सुरक्षा र विकाससम्बन्धी हितको दृढतापूर्वक रक्षा गर्दै अमेरिकासँग द्विपक्षीय सम्बन्धलाई स्थिर र सन्तुलित दिशामा अघि बढाउन तयार रहेको स्पष्ट पारे। तर, त्यसका लागि अमेरिकाले गुटीय टकराव भड्काउने अभ्यास बन्द गर्नुपर्ने, चीनका मूल हितसँग जोडिएका विषयमा दोहोरो नीति नअपनाउनुपर्ने र सैन्य सम्बन्धलाई स्वस्थ तथा स्थायित्वतर्फ लैजान ठोस कदम चाल्नुपर्नेमा उनले जोड दिए।

चीन–अमेरिका सम्बन्ध विश्व राजनीति र क्षेत्रीय सुरक्षामा निर्णायक प्रभाव पार्ने विषय भएकाले, बेइजिङको यो भनाइलाई आगामी दिनमा दुवै देशबीचको सैन्य तथा कूटनीतिक संवादको दिशासँग जोडेर गम्भीर रूपमा हेरिएको छ।