चीन–भारत वार्ता : सहअस्तित्वको नयाँ अध्याय
नयाँ दिल्ली — चीन र भारतबीच रणनीतिक वार्ताको नयाँ चरण सुरु भएको छ। फेब्रुअरी १० तारिख नयाँ दिल्लीमा भएको उच्चस्तरीय बैठकमा चिनियाँ उपपरराष्ट्रमन्त्रीमा चाउस्वी र भारतीय विदेश सचिव विक्रम मिश्रीबीच मैत्रीपूर्ण तथा गहन छलफल भयो।
दुवै पक्षले वर्तमान अन्तर्राष्ट्रिय परिस्थितिलाई दृष्टिगत गर्दै चीन र भारतजस्ता दुई ठूला छिमेकी राष्ट्रबीच रणनीतिक सहकार्यको आवश्यकतामा जोड दिए। वार्ताका क्रममा चिनियाँ राष्ट्राध्यक्ष सी चिनफिङ र भारतीय प्रधानमन्त्री नरेन्द्र मोदीबीच भएका महत्त्वपूर्ण सहमतिहरूलाई इमान्दारीपूर्वक कार्यान्वयन गर्ने प्रतिबद्धता दुवै तर्फबाट व्यक्त गरियो।
छलफलमा द्विपक्षीय सम्बन्ध, आ–आफ्नो घरेलु तथा विदेश नीति, साझा चासोका अन्तर्राष्ट्रिय तथा क्षेत्रीय मुद्दाहरूमा व्यापक रूपमा विचार विमर्श भएको जनाइएको छ।
वार्तापछि जारी विज्ञप्तिअनुसार चीन र भारत यस वर्ष र आगामी वर्ष ब्रिक्स देशहरूको अध्यक्षको रूपमा एकअर्कालाई सहयोग गर्न सहमत भएका छन्। दुवै पक्षले बहुपक्षीयता र संयुक्त राष्ट्रसंघको केन्द्रीय भूमिकाप्रति आफ्नो प्रतिबद्धता दोहोर्याएका छन्।
यसैगरी, विश्वव्यापी दक्षिण (ग्लोबल साउथ) को एकता र सहकार्यलाई सुदृढ पार्ने, अन्तर्राष्ट्रिय निष्पक्षता र न्याय कायम राख्ने तथा बहुध्रुवीय विश्व व्यवस्थालाई प्रवर्द्धन गर्ने विषयमा दुवै पक्षबीच सहमति भएको छ।
वार्ताले एसिया मात्र नभई सम्पूर्ण विश्वकै शान्ति र विकासमा योगदान पुर्याउने अपेक्षा गरिएको छ। दुई छिमेकी राष्ट्रबीच बढ्दो सहकार्य र संवादले क्षेत्रीय स्थायित्वका लागि सकारात्मक सन्देश प्रवाहित गरेको विश्लेषकहरू बताउँछन्।
