बेइजिङमा ‘जुसो’ पुस्तक मेला : १४० प्रदर्शकको सहभागिता, पुरानो पुस्तकको कारोबारदेखि साहित्यिक सेमिनारसम्म

बेइजिङ । विश्व पुस्तक तथा प्रतिलिप्याधिकार दिवस र चीनको राष्ट्रिय पठन सप्ताहभन्दा अगाडि बेइजिङको ‘टुडे आर्ट म्युजियम’ मा ‘जुसो’ पुस्तक मेला सुरु भएको छ। यो मेला बिहीबारदेखि शुरु भई अप्रिल ६ सम्म सञ्चालन हुनेछ। पढन संस्कृतिलाई प्रवर्द्धन गर्ने उद्देश्यले आयोजित यो मेलाले साहित्यप्रेमी, लेखक, प्रकाशक र पाठकबीच एक साझा मञ्च सिर्जना गरेको छ।

यस पुस्तक मेलाले कुल १४० स्वदेशी तथा अन्तर्राष्ट्रिय प्रदर्शकहरूलाई आकर्षित गरेको छ। जसमा साहित्य र मानविकीमा केन्द्रित प्रकाशकहरूदेखि लिएर कला, फोटोग्राफी र डिजाइनका विशिष्ट पुस्तकहरूमा समर्पित स्वतन्त्र ब्रान्डहरूसम्म सहभागी छन्। यसले पुस्तक जगत्को विविधता र समृद्धिलाई उजागर गरेको छ।

कार्यक्रममा आगन्तुकहरूले सांस्कृतिक तथा सिर्जनात्मक उत्पादनहरू अवलोकन गर्न, साहित्यिक सिर्जना, सम्पादन अभ्यास, डिजाइन विधि र अनुवादसम्बन्धी प्रदर्शनी तथा सेमिनारहरूमा सहभागी हुन, र पुराना पुस्तकहरूको कारोबार गर्न समेत पाउनेछन्। पुरानो पुस्तकको यो आदानप्रदानले दुर्लभ संग्रह र पुराना संस्करणका पुस्तकहरूको संरक्षण तथा प्रचारमा टेवा पुर्याउने विश्वास गरिएको छ।

सन् २०२३ मा एउटै नामको पुस्तक पसलले पहिलोपटक सुरु गरेको यो मेला सर्वसाधारणमा पठन संस्कारको विकास गर्ने उद्देश्यले प्रत्येक वर्ष आयोजना हुँदै आएको छ। यसपटकको मेलाले विश्व पुस्तक दिवस (अप्रिल २३) र चीनको राष्ट्रिय पठन सप्ताहको पूर्वसन्ध्यामा विशेष महत्व राख्दछ। जसले पुस्तकप्रतिको मोह र ज्ञानको खोजलाई विश्वव्यापी रूपमा जोड्ने प्रयास गरेको छ। चीनमा यसरी पठन संस्कृतिलाई निरन्तरता दिनुले राष्ट्रिय जागरुकता र बौद्धिक विकासमा पुस्तकको भूमिकालाई पुनः स्थापित गरेको छ।