भारतीय राजदूत श्रीवास्तवको परराष्ट्रमन्त्री खनाललाई शिष्टाचार भेट, जयशंकरको शुभकामना सन्देश सुनाए
काठमाडौं । नेपालका लागि भारतीय राजदूत नवीन श्रीवास्तवले आज परराष्ट्रमन्त्री शिशिर खनालसँग शिष्टाचार भेट गरेका छन्। सिंहदरबारस्थित परराष्ट्र मन्त्रालयमा भएको सो भेटमा राजदूत श्रीवास्तवले मन्त्री खनाललाई उनको नियुक्तिपछि भारतीय विदेशमन्त्री डा. एस. जयशंकरको हार्दिक शुभकामना सन्देश सुनाए।
भेटवार्ताका क्रममा नेपाल–भारत द्विपक्षीय सम्बन्ध तथा दुई देशबीचको सहकार्यका विभिन्न विषयमा गहन छलफल भएको परराष्ट्र मन्त्रालयले जनाएको छ। दुवै पक्षले आपसी हित र पारस्परिक समझदारीका साथ सम्बन्ध अघि बढाउने प्रतिबद्धता व्यक्त गरेको बुझिएको छ।
राजदूत श्रीवास्तवको यो भेट नेपालको नवगठित सरकारसँगको औपचारिक कूटनीतिक सम्पर्कको क्रममा भएको हो। नेपाल–भारत सम्बन्धका विविध पक्षलाई थप मजबुत बनाउन आगामी दिनमा दुवै देशबीच उच्चस्तरीय भेटघाट र संयन्त्रको निरन्तरताको पनि यस भेटमा चर्चा भएको स्रोतले जनाएको छ। परराष्ट्रमन्त्री खनालले आफ्नो कार्यकालमा छिमेकी मित्रराष्ट्र भारतसँगको सम्बन्धलाई थप गति दिने विश्वास व्यक्त गरेको बताइन्छ।
