जनताको घरदैलोमा पुगेर राष्ट्रपति सीले भने : हामीले गर्ने हरेक कार्य जनताको सुखका लागि हो
बेइजिङ / चिनियाँ नयाँ वर्षको पहिलो दिन, बेइजिङको मध्यभागमा उत्सवको रौनक नयाँ उचाइमा पुग्छ। विशेषतः ऐतिहासिक लङ्फुसी व्यापारिक क्षेत्रमा राताम्य लालटिनहरू हावासँगै हल्किँदै झुल्छन्, नयाँ वर्षको मेलामा व्यापारीहरूको आवाज घन्किन्छ, र चाडपर्वका परिकारको सुगन्धले वातावरण झन रमाइलो बनाउँछ।
झण्डै ६ सय वर्ष पुरानो लङ्फुसी बेइजिङको सांस्कृतिक पहिचान बोकेको ऐतिहासिक स्थल हो। एक समय सहरकै महत्वपूर्ण मन्दिर मेलाका लागि प्रसिद्ध यो क्षेत्र शहरी पुनर्निर्माणपछि फेरि वसन्त पर्वको मुख्य आकर्षण बनेको छ। यहाँ परिवारहरू नयाँ वर्षका सामग्री किनमेल गर्न, परम्परा स्मरण गर्न र पुरानो बेइजिङसँग जोडिएका सांस्कृतिक अभ्यासहरू पुनर्जीवित गर्न भेला हुन्छन्।
यही स्थलमा फागुन ५ गते चीनका राष्ट्रपति सी चिनफिङ पुगे, जब सर्वसाधारण वसन्त पर्वको अन्तिम तयारीमा व्यस्त थिए। परम्परागत कागजी कटिङ, माटोका मूर्तिहरू र हस्तनिर्मित सामग्रीले सजिएका स्टलहरूले उत्सवको वातावरण थप जीवन्त बनाएका थिए। बजारमा घुम्दै राष्ट्रपति सीले स्थानीय परिकार नियाल्दै व्यापारीहरूसँग व्यवसायको अवस्थाबारे कुराकानी गरे र शुभकामना आदान–प्रदान गरे।
बेइजिङमै हुर्किएका सीले बाल्यकालमा लङ्फुसी पुगेको सम्झना सुनाए। यसपटक उनले स्थानीयवासीबीच लोकप्रिय चाडपर्वका परिकार र सांस्कृतिक सामग्री खरिद गरे। वरिपरि जम्मा भएका बालबालिकासँग उनले पढाइ, विद्यालय जीवन र भविष्यबारे जिज्ञासा राखे। “परीक्षाको अंक जीवनको सम्पूर्ण मापन होइन, समग्र व्यक्तित्व विकास नै समाजसँग घुलमिल हुनका लागि महत्वपूर्ण हुन्छ,” उनले सुझाए। साथै, बालबालिकालाई बाहिर खेल्न, शारीरिक रूपमा तन्दुरुस्त रहन प्रेरित गरे।
चोकमा स्थानीयसँगै ढोल–नगारा प्रदर्शन अवलोकन गर्दै उनले स्वदेश तथा विदेशमा रहेका सम्पूर्ण चिनियाँ समुदायलाई वसन्त पर्वको शुभकामना व्यक्त गरे। तर यो भ्रमण केवल उत्सवको खुसी बाँड्ने कार्यक्रम मात्र थिएन। वसन्त पर्व पारिवारिक पुनर्मिलनको संवेदनशील क्षण भएकाले उनले स्थानीय प्रशासनलाई आपूर्ति व्यवस्थापन, बजार स्थिरता र सार्वजनिक सुरक्षामा विशेष ध्यान दिन निर्देशन दिए।
२०१३ यता, चीनको सर्वोच्च नेतृत्व सम्हालेपछि राष्ट्रपति सीका लागि वसन्त पर्व जनतासँग सिधा संवाद गर्ने अवसर बनेको छ। सहरका बस्तीदेखि दुर्गम गाउँसम्म पुगेर उनले हिउँदमा तताउने सुविधा, स्वास्थ्य सेवा, आयआर्जन र बालशिक्षाजस्ता दैनिकीसँग जोडिएका विषयमा चासो राख्दै आएका छन्। “जनताको कुनै पनि समस्या सानो हुँदैन,” उनले सन् २०२६ को नयाँ वर्ष सन्देशमा भनेका थिए, “जब प्रत्येक घरमा जीवनको मधुर ध्वनि गुन्जिन्छ, राष्ट्रको ठूलो परिवार अझ सबल बन्छ।”
यस वर्ष उनले विशेष रूपमा ज्येष्ठ नागरिकको कल्याणमा जोड दिए। चीन तीव्र जनसंख्या वृद्धावस्थातर्फ अघि बढिरहेको छ, जहाँ करिब पाँचमध्ये एक जना ६० वर्ष वा सोभन्दा माथिका छन्। लङ्फुसी पुग्नुअघि उनले औसत ८८ वर्ष उमेरका ११० भन्दा बढी ज्येष्ठ नागरिक रहेको एक वृद्धाश्रमको भ्रमण गरे। त्यहाँको स्वास्थ्य सेवा, पुनर्स्थापना कार्यक्रम र मनोरञ्जन गतिविधिबारे जानकारी लिँदै उनले भने, “ज्येष्ठ नागरिकको हेरचाह सम्पूर्ण समाजको साझा जिम्मेवारी हो,” र सेवाको गुणस्तर थप सुधार गर्न आग्रह गरे।
उक्त क्षेत्र चीनको शहरी स्तरोन्नतिको उदाहरण पनि बनेको छ, जहाँ अवरोध–रहित संरचना र ज्येष्ठ–मैत्री पूर्वाधार विकास गरिएको छ। नजिकैको ज्येष्ठ नागरिक क्यान्टिनमा उनले छुट मूल्यमा भोजन लिइरहेका डेलिभरी कर्मीहरूसँग भेट गरे। व्यस्त समयअघि खाना खाइरहेका उनीहरूसँग उनले उनीहरूको कार्यजीवन, आयआर्जन र चाडपर्वमा घर फर्कने योजनाबारे सोधे।
प्लेटफर्म अर्थतन्त्रसँग जोडिएका यस्ता नयाँ रोजगारी क्षेत्रमा चीनभर करिब ८४ मिलियन मानिस संलग्न छन्, जसमा धेरैजसो ३५ वर्षमुनिका छन्। गत वर्ष चीनको कुरियर क्षेत्रले झण्डै २०० अर्ब पार्सल डेलिभरी गर्दै नयाँ कीर्तिमान बनाएको थियो, जसले अनलाइन उपभोग अर्थतन्त्रमा यसको महत्व पुष्टि गर्छ। “सहरको सहज सञ्चालन तपाईंहरूजस्ता श्रमिकहरूकै मेहनतमा निर्भर छ,” उनले डेलिभरी कर्मीहरूलाई सम्बोधन गर्दै सम्बन्धित निकायलाई उनीहरूको हितमा थप सेवा र समर्थन विस्तार गर्न आग्रह गरे।
चीनको शासन दर्शनमा ‘जनतामै केन्द्र’ भन्ने सिद्धान्तलाई व्यवहारमा उतार्ने प्रयास स्वरूप, राष्ट्रपति सीले गरिबी निवारणदेखि साझा समृद्धिसम्मका कार्यक्रम अघि बढाएका छन्। आठ वर्षे अभियानमार्फत करिब १० करोड ग्रामीण बासिन्दालाई गरिबीबाट माथि उठाउँदै चीनले सन् २०२१ सम्म पूर्ण गरिबी उन्मूलनको लक्ष्य हासिल गर्यो। १४औँ पञ्चवर्षीय योजना (२०२१–२०२५) अवधिमा शहरी रोजगारी औसत वार्षिक १ करोड २० लाखभन्दा बढीले वृद्धि भयो, प्रतिव्यक्ति उपभोग्य आम्दानी ४३,३७७ युआन पुगेको छ र औसत आयु ७९ वर्ष पुगेको छ।
अब चीन १५औँ पञ्चवर्षीय योजना (२०२६–२०३०) को तयारीमा छ, जसले सन् २०३५ सम्म आधारभूत समाजवादी आधुनिकीकरण हासिल गर्ने दिशामा निर्णायक चरण निर्धारण गर्नेछ। यस योजनामा ‘जनतालाई पहिलो प्राथमिकता’ मुख्य मार्गदर्शक सिद्धान्तका रूपमा स्थापित गरिएको छ, ताकि आधुनिकीकरणका उपलब्धि सबैमा अझ समतामूलक र व्यापक रूपमा पुग्न सकून्।
घोडा वर्षको स्वागत समारोहमा बोल्दै राष्ट्रपति सीले १५औँ पञ्चवर्षीय योजनाको सफल सुरुआतका लागि जुट्न आह्वान गरे र स्मरण गराए, “हाम्रो पार्टी जनताका लागि जन्मिएको हो र जनताकै कारण समृद्ध भएको हो। हामीले गर्ने हरेक कार्य जनताको सुखका लागि हो।”
लङ्फुसीको चहलपहलदेखि वृद्धाश्रम र श्रमिक क्यान्टिनसम्मको यो यात्रा केवल औपचारिक भ्रमण थिएन; यो शासनको दर्शन, सामाजिक जिम्मेवारी र जनताको दैनिकीप्रतिको संवेदनशील प्रतिबद्धताको सन्देश थियो—जहाँ उत्सवको रौनकसँगै ‘जनतामै सुख’ भन्ने विचार केन्द्रमा थियो।
