सांस्कृतिक सेतु : मकाउमा सुनौला ड्र्यागनको साथै नयाँ वर्ष स्वागत
मकाउ, १८ फेब्रुअरी । चिनियाँ नयाँ वर्ष (घोडा वर्ष) को पहिलो दिन मंगलबार मकाउ पर्यटन कार्यालयले भव्य कार्यक्रमको आयोजना गर्दै पर्यटक तथा स्थानीय बासिन्दालाई शुभकामना व्यक्त गरेको छ। सेन्ट पल भग्नावशेष क्षेत्रमा आयोजित उद्घाटन समारोहमा २३८ मिटर लामो सुनौलो ड्र्यागन र १८ वटा नृत्य गर्ने सिंहलाई आँखा अंकित गर्ने परम्परागत विधि सम्पन्न गरिएको थियो।
कार्यक्रममा मकाउ पर्यटन कार्यालयकी निर्देशक मारिया हेलेना डे सेना फर्नान्डिसले नयाँ वर्षको हार्दिक शुभकामना व्यक्त गर्दै घोडा वर्षले मकाउ र सबैका लागि समृद्धि तथा खुशियाली ल्याउने विश्वास व्यक्त गरिन्।
स्थानीय बासिन्दा सुश्री लामले विहानैदेखि परेड हेर्नको लागि प्रतिक्षा गरेको बताइन्। प्रायः प्रत्येक वर्ष यो कार्यक्रम अवलोकन गर्ने उनले कलाकारहरूसँग अन्तर्क्रिया गर्न पाउँदा खुशी व्यक्त गरिन्। “यस्ता कार्यक्रमहरू अझ बढी होऊन्,” उनले आग्रह गरिन्।
परेडमा सुनौलो ड्र्यागन, नृत्य गर्ने सिंह, भाग्यका देवता, खुशी, समृद्धि र दीर्घायुका तीन देवता, घोडा राशिको शुभंकर र मकाउको पर्यटन शुभंकर माक माकले मुख्य ऐतिहासिक स्थलहरू र सडकमा रमाइलो प्रस्तुति दिएका थिए।
चाइनिज नयाँ वर्ष मनाउन बेइजिङबाट मकाउ आएका श्री चेनले यहाँको पर्वीय वातावरण निकै जीवन्त रहेको बताए। पाँच दिनदेखि मकाउमा रहेका उनले यति लामो ड्र्यागन पहिलोपटक देखेको अनुभव सुनाउँदै “यो अत्यन्तै भव्य र प्रभावशाली छ,” भने।
पर्यटन कार्यालयका अनुसार दुई दिनसम्म चल्ने यस सामुदायिक कार्यक्रममा मकाउ ग्रान्ड प्रिक्स संग्रहालय क्षेत्र, बार्रा स्क्वायर र ताइपा भिल्लालगायत विभिन्न स्थानमा कला टोलीहरूले प्रस्तुति दिने कार्यक्रम रहेको छ।
