सैन्य शुद्धीकरणको सी सन्देश ‘व्यक्तिगत लाभ र भ्रष्टाचार पार्टीको स्वभावसँग मेल खाँदैन’, उच्च अधिकारीलाई जनमुक्ति सेनाको शताब्दीकै कडा निर्देशन

बेइजिङ । चिनियाँ राष्ट्रपति एवं केन्द्रीय सैन्य आयोगका अध्यक्ष सी चिनफिङले जनमुक्ति सेनाको पवित्रता र गौरवलाई अक्षुण्ण राख्न सैन्य निकायभित्र राजनीतिक शुद्धीकरणको अभियानलाई थप गहिरो बनाउन निर्देशन दिएका छन्। बुधबार बेइजिङस्थित राष्ट्रिय रक्षा विश्वविद्यालयमा उच्चस्तरीय सैन्य अधिकारीहरूका लागि आयोजित एक विशेष प्रशिक्षण सत्रको उद्घाटन समारोहलाई सम्बोधन गर्दै अध्यक्ष सीले सन् २०२७ मा मनाइने जनमुक्ति सेनाको स्थापनाको शतवार्षिकीको अवसरमा नयाँ राजनीतिक चेतना र स्वरूपका साथ स्वागत गर्न आह्वान गरे।

कम्युनिस्ट पार्टीको केन्द्रीय समितिका महासचिव समेत रहेका सीले आदर्श र विश्वासको महत्त्वलाई रेखाङ्कित गर्दै भने, “पार्टी र सेनाको हिस्सा हुनु भनेको मार्क्सवादप्रति दृढ आस्था र पार्टीप्रति पूर्ण निष्ठा राख्नु हो।” उनले उच्चस्तरीय सैन्य अधिकारीहरूलाई पार्टीभित्रको राजनीतिक गतिविधिलाई गम्भीरतापूर्वक सम्पादन गर्न र सत्य बोल्ने कार्यमा अगुवाइ गर्न निर्देशन दिए।

राष्ट्रपति सीले व्यक्तिगत लाभ र भ्रष्टाचारबाट प्रेरित कुनै पनि सोच वा कार्य पार्टीको प्रकृति र उद्देश्यसँग पूर्णतया असंगत रहेको स्पष्ट पारे। उनले उच्च सैन्य पदाधिकारीहरूलाई पार्टी र सेनाका उत्कृष्ट परम्पराहरूको पुनर्स्थापना र निरन्तरतामा नेतृत्वदायी भूमिका खेल्न, पदीय घमण्ड त्याग्न र क्रान्तिकारी सैनिकको पहिचानप्रति सच्चा रहन आग्रह गरे।

कानुन र नियमको शासनमा जोड दिँदै अध्यक्ष सीले भने, “कानुन र नियम सबैका सामु समान हुन्छन्। यिनको पालनामा कोही विशेष हुँदैन र कार्यान्वयनमा कुनै अपवाद हुँदैन।”

नयाँ ऐतिहासिक परिवेशमा सेनाभित्र अभूतपूर्व एकता र सुदृढता कायम हुने विश्वास व्यक्त गर्दै सीले बलियो सेना निर्माणको नयाँ अध्याय लेखिने बताए। केन्द्रीय सैन्य आयोगका उपाध्यक्ष चाङ सेङमिनले उक्त प्रशिक्षण सत्रको उद्घाटन समारोहको अध्यक्षता गरेका थिए।

सन् २०२७ मा जनमुक्ति सेनाको शताब्दी मनाउने तयारीका बीच आएको अध्यक्ष सीको यो निर्देशनले चिनियाँ सेनाभित्र अनुशासन, निष्ठा र राजनीतिक शुद्धतालाई सर्वोपरि राख्ने नीतिलाई थप मजबुत बनाएको विश्लेषकहरूको भनाइ छ।