चार वर्षमा चौथो चीन यात्रामा स्पेनी प्रधानमन्त्री, सी र लीसँग हुने भेटवार्ताले द्विपक्षीय सम्बन्धलाई नयाँ उचाइको अपेक्षा
बेइजिङ । स्पेनका प्रधानमन्त्री पेड्रो सान्चेजले चिनियाँ प्रधानमन्त्री ली छ्याङको औपचारिक निमन्त्रणामा आगामी अप्रिल ११ देखि १५ सम्म चीनको औपचारिक भ्रमण गर्ने भएका छन्। चिनियाँ विदेश मन्त्रालयले बुधबार यसबारे आधिकारिक घोषणा गरेको हो।
विदेश मन्त्रालयकी प्रवक्ता माओ निङले पत्रकार सम्मेलनमा जानकारी दिँदै यो भ्रमण सान्चेजको पछिल्लो चार वर्षको अवधिमा चौथो चीन यात्रा हुने र गत वर्ष स्पेनी नरेश फेलिपे षष्ठम् र प्रधानमन्त्री सान्चेजको भ्रमणपश्चात् छोटो अन्तरालमै हुन लागेको अर्को महत्त्वपूर्ण उच्चस्तरीय आदानप्रदान रहेको बताइन्।
प्रवक्ता माओका अनुसार भ्रमणका क्रममा चिनियाँ राष्ट्रपति सी चिनफिङले सान्चेजसँग भेटवार्ता गर्नेछन् भने प्रधानमन्त्री ली छ्याङ र राष्ट्रिय जनकंग्रेस स्थायी समितिका अध्यक्ष चाओ लचीले क्रमशः छुट्टाछुट्टै वार्ता तथा भेटघाट गर्ने कार्यक्रम रहेको छ। उनीहरूबीच द्विपक्षीय सम्बन्ध र साझा चासोका विषयहरूमा गहन आदानप्रदान हुनेछ।
युरोपेली सङ्घभित्र चीनको महत्त्वपूर्ण साझेदार राष्ट्रको रूपमा स्पेन रहेको उल्लेख गर्दै प्रवक्ता माओले पछिल्ला वर्षहरूमा दुवै देशका नेताहरूको रणनीतिक मार्गदर्शनमा चीन-स्पेन सम्बन्ध उच्च स्तरमा विकास भइरहेको र विभिन्न क्षेत्रमा भएको सहकार्यले दुवै देशका जनतालाई ठोस लाभ पुर्याएको बताइन्।
माओले थपिन्, “चीन प्रधानमन्त्री सान्चेजको भ्रमणलाई एउटा अवसरको रूपमा लिँदै स्पेनसँग मिलेर रणनीतिक आपसी विश्वासलाई थप गहिरो बनाउन, आदानप्रदान र सहकार्यलाई सुदृढ गर्न, बहुपक्षीय समन्वयलाई मजबुत पार्न र चीन-स्पेन सम्बन्धलाई उच्च स्तरमा पुर्याउन इच्छुक छ, जसले विश्व शान्ति र स्थायित्वको रक्षा गर्न थप योगदान पुर्याउनेछ।”
स्पेनी प्रधानमन्त्रीको यो चौथो चीन भ्रमणले दुई देशबीचको आर्थिक, व्यापारिक तथा सांस्कृतिक सम्बन्धलाई नयाँ गति प्रदान गर्ने अपेक्षा गरिएको छ। युरोपेली मुलुकहरूसँगको सम्बन्ध विस्तारको चिनियाँ रणनीतिमा स्पेनलाई एउटा महत्त्वपूर्ण प्रवेशद्वारको रूपमा हेरिएको छ।
