प्रधानमन्त्री कार्की मुक्तिनाथ जाँदै : दर्शन, निर्वाचन प्रशिक्षण र फिर्ती कार्यक्रम
काठमाडौं / प्रधानमन्त्री सुशीला कार्कीले भोलि बिहान मुक्तिनाथ दर्शन गर्ने रहर गरेकी छिन्। प्रधानमन्त्री कार्की भोलि बिहान ७:३० बजे त्यसतर्फ जाने कार्यक्रम तय भएको छ, जसका लागि नेपाली सेनाको ‘एनए ०५८ कल साइन’ सहितको अगुस्ता हेलिकप्टर परिचालन गरिएको छ।
प्रधानमन्त्री कार्की राजधानीबाट सीधै मुस्ताङतर्फ प्रस्थान गर्नेछिन्। यात्राका क्रममा पोखरामा इन्धन भरेपछि उनी मुस्ताङको जोमसोम पुग्नेछिन् र त्यहाँबाट मुक्तिनाथ मन्दिरमा पूजा-आराधना गर्ने कार्यक्रम छ। धार्मिक पर्यटन प्रवर्द्धन र मुस्ताङको विकासका सम्बन्धमा स्थानीय जनप्रतिनिधिसँग छलफल गर्ने सम्भावना समेत रहेको स्रोतको दाबी छ।
मुक्तिनाथ दर्शनपछि प्रधानमन्त्री कार्की सोही दिन पोखरा फर्कने योजनामा छिन्। पोखराबाट उनी बुटवलस्थित मध्य एयरबेस (२२ बाहिनी अड्डा, रामनगर) मा अवतरण गर्नेछिन्। त्यसपछि भोलिपल्ट (९ गते) बिहान उनी लुम्बिनी प्रदेश तालिम केन्द्रमा आयोजित प्रदेशस्तरीय निर्वाचन प्रशिक्षण कार्यक्रममा प्रमुख अतिथिका रूपमा सहभागी हुनेछिन्।
कार्यक्रम सकिएपछि प्रधानमन्त्री कार्की सोही दिन काठमाडौं फर्कने कार्यक्रम रहेको उनका स्वकीय सचिव आदर्श श्रेष्ठले जानकारी दिए। दुई दिनको यस आकाशीय यात्रामा प्रधानमन्त्रीको स्वास्थ्य, सुरक्षा र तालिकालाई मध्यनजर गर्दै सुरक्षा व्यवस्था कडा पारिएको छ।
