श्रीलंकाको पहरामा चिनियाँ ठगी गिरोह धरापमा, १२५ जना स्वदेश फिर्ता
बेइजिङ । दूरसञ्चार ठगी (टेलिकम फ्रड) मा संलग्न रहेको आशङ्कामा श्रीलंकाली प्रहरीले पक्राउ गरेका १२५ जना चिनियाँ नागरिकहरूलाई चीन फिर्ता पठाइएको छ। चिनियाँ जनसुरक्षा मन्त्रालयले बिहीबार यो जानकारी दिएको हो।
मन्त्रालयका अनुसार, श्रीलंकास्थित चिनियाँ दूतावास र चिनियाँ प्रहरीको समन्वय तथा सहयोगमा गत मार्च २९ का दिन यी शङ्कास्पद व्यक्तिहरूलाई स्वदेश फिर्ता पठाइएको थियो। यो संयुक्त कारबाही चिनियाँ र श्रीलंकाली प्रहरीबीचको गहन अन्तर्राष्ट्रिय कानुन कार्यान्वयन सहकार्यको परिणाम भएको मन्त्रालयले जनाएको छ।
मन्त्रालयका अनुसार, यस वर्षको सुरुदेखि नै केही दूरसञ्चार ठगी र भूमिगत कारोबारमा संलग्न व्यक्तिहरू अन्य मुलुकहरूबाट भागेर श्रीलंकामा शरण लिन थालेको उल्लेखनीय प्रवृत्ति देखिएको थियो। यसैलाई ध्यानमा राख्दै दुई देशका प्रहरी निकायहरूबीच सहकार्यलाई थप सुदृढ बनाइएको थियो।
पछिल्लो समयमा श्रीलंकाली प्रहरीले गरेका धेरैवटा धरपकड कारबाहीका क्रममा ठगीका थुप्रै अखडाहरू (फ्रड डेन) ध्वस्त पारिएको र दूरसञ्चार ठगीमा संलग्न कयौं व्यक्तिहरूलाई पक्राउ गरिएको मन्त्रालयले जनाएको छ। स्वदेश फिर्ता पठाइएकाहरूमाथि हाल मध्य चीनको हुबेई प्रान्तको सार्वजनिक सुरक्षा निकायले थप अनुसन्धान अघि बढाइरहेको छ।
चिनियाँ जनसुरक्षा मन्त्रालयका एक अधिकारीले थप अन्तर्राष्ट्रिय साझेदारहरूसँग कानुन कार्यान्वयन सहकार्यलाई निरन्तरता दिँदै अन्तरदेशीय अपराधलाई कारबाही गर्न व्यावहारिक र प्रभावकारी नयाँ संयन्त्रको स्थापना गर्ने प्रतिबद्धता व्यक्त गरेका छन्।
