इजरायली आक्रमणबीच बेरुतलाई इस्लामाबादको काँध : प्रधानमन्त्री शरिफले लेबनानी समकक्षीलाई भने “क्षेत्रीय शान्तिकै लागि इरान–अमेरिका वार्ता गराएका हौं”
इस्लामाबाद । पाकिस्तानका प्रधानमन्त्री शहबाज शरिफले बिहीबार लेबनानी समकक्षी नवाफ सलामसँग टेलिफोन संवाद गर्दै इजरायली आक्रमणमा परी हजारौंको ज्यान गएकोमा गहिरो समवेदना प्रकट गरेका छन्। प्रधानमन्त्री कार्यालयका अनुसार दुई नेताबीच लेबनानमाथि जारी इजरायली आक्रमण र क्षेत्रीय शान्ति पहलबारे केन्द्रित छलफल भएको हो।
प्रधानमन्त्री कार्यालयले जारी गरेको विज्ञप्तिमा भनिएको छ, “प्रधानमन्त्री शरिफले लेबनानमा भएको द्वन्द्वमा हजारौंको ज्यान गएकोमा शोक व्यक्त गर्दै पाकिस्तान क्षेत्रीय शान्तिका लागि इमानदार प्रयासमा संलग्न रहेको बताए।” उनले थपे, “यही भावनाका साथ इरान र संयुक्त राज्य अमेरिकाबीच शान्ति वार्ता आयोजना गरिएको हो।”
पाकिस्तानले अमेरिका र इरानबीचको दुई साताको युद्धविराम गराउन महत्त्वपूर्ण मध्यस्थकर्ताको भूमिका निर्वाह गरेको सन्दर्भमा प्रधानमन्त्री शरिफको यो अभिव्यक्तिले क्षेत्रीय शान्ति स्थापनामा इस्लामाबादको निरन्तर सक्रियतालाई पुष्टि गरेको छ।
यसैगरी, लेबनानी प्रधानमन्त्री सलामले लेबनान र त्यहाँका जनतामाथि भइरहेको आक्रमण तत्काल रोक्न पाकिस्तानको सहयोग मागेका थिए। प्रधानमन्त्री कार्यालयका अनुसार दुवै नेताले नियमित सम्पर्कमा रहिरहने सहमति गरेका छन्।
यो टेलिफोन वार्ता यस्तो बेला भएको छ, जब इरान र अमेरिकाबीच युद्धविरामको घोषणा भएको भोलिपल्टै इजरायलले लेबनानमा भीषण हवाई आक्रमण गरेको थियो, जसमा दुई सयभन्दा बढीको ज्यान गएको छ। इजरायलले हिजबुल्लाहविरुद्धको लडाइँ युद्धविराम सम्झौताको हिस्सा नभएको दाबी गर्दै लेबनानमा सैन्य कारबाही जारी राखेको छ।
