लुफ्थान्साका १२३ यात्रु विमानमै अलपत्र : जर्मनीमा सेवा र मानवीय संवेदनामाथि प्रहार
म्युनिख। जर्मनीको म्युनिख विमानस्थलमा एक विचित्र र अमानवीय घटना भएको छ। खराब मौसमका कारण ढिला भएको उडानपछि लुफ्थान्सा एयरलाइन्सका १२३ यात्रु रातभर विमानभित्रै अलपत्र परेका छन्। विमानस्थलका कर्मचारी र बस चालकहरू आ-आफ्नो सिफ्ट सकिएपछि घर गएकाले यात्रुलाई टर्मिनलसम्म पुर्याउने कोही नभएपछि यस्तो अवस्था आएको हो।
खराब मौसमका कारण उडानमा ढिलाइ भएपछि कर्मचारीहरूले यात्रुलाई विमानमै छाडेर घर गएको घटनाले जर्मनीको सेवा क्षेत्रमा गम्भीर प्रश्न खडा भएको छ। यस्तै समस्या ग्दान्स्क, ग्राज, भेनिस र सिङ्गापुर जाने चार अन्य उडानका ४०० यात्रुले समेत भोग्नुपरेको बताइएको छ।
जर्मनीको रेल सेवामा पनि यात्रुहरू यस प्रकारको समस्यामा धेरै पटक परेको तथ्यले यो कुनै पहिलो घटना नभएको पुष्टि गर्छ। सेवा प्रदायक संस्थाका कर्मचारीहरूले समय सकिएपछि यात्रुलाई बीचैमा छाडेर जाने प्रवृत्तिले जर्मनीको सेवा क्षेत्रमा व्यावसायिकता र मानवीय संवेदनामाथि नै प्रश्न खडा भएको छ।
विमानस्थलमा यात्रुलाई टर्मिनलसम्म पुर्याउने कुनै व्यवस्था नहुनु र कर्मचारीहरूले यात्रुप्रति देखाएको उदासीनताले अन्तर्राष्ट्रियस्तरमै आलोचना भएको छ। यस घटनाले विकसित मुलुकको सेवा क्षेत्रमा समेत यस्ता अमानवीय घटना हुनसक्छन् भन्ने देखाएको छ।
