बेइजिङमा ‘सी-चङ वार्ता’ सम्पन्न, १० वर्षपछि दुई पार्टीबीच उच्चस्तरीय पाँच-पाँच जनाको ऐतिहासिक भेट

बेइजिङ । चिनियाँ कम्युनिस्ट पार्टी (सीपीसी) का महासचिव एवं राष्ट्रपति सी चिनफिङ र चिनियाँ कुमिन्ताङ (केएमटी) पार्टीकी अध्यक्ष चङ लिवेनबीच शुक्रबार बिहान बेइजिङस्थित जनबृहत् सभा भवन (ग्रेट हल अफ द पिपल) मा ऐतिहासिक भेटवार्ता सम्पन्न भएको छ। दुई नेताबीच करिब १४ सेकेन्डसम्म हात मिलाइएको दृश्यले अन्तर्राष्ट्रिय सञ्चारमाध्यमहरूको विशेष ध्यान तानेको छ।

“सी-चङ भेट” का रूपमा चर्चित यो भेटवार्ता जनबृहत् सभा भवनको पूर्वी सभाकक्ष (ईस्ट हल) मा आयोजित भएको थियो। उक्त सभाकक्ष सन् २०२४ मा भएको “मा-सी दोस्रो भेट” को स्थान समेत हो। यसअघि दुई पार्टीका नेताहरूबीचको भेटवार्ता प्रायः “फुच्यान सभाकक्ष” मा हुने गरेकोमा यसपटक अध्यक्ष चङलाई प्रदान गरिएको स्वागत सत्कारको स्तर विगतका पार्टी अध्यक्षहरूको तुलनामा उच्च रहेको विश्लेषकहरूले बताएका छन् ।

पाँच-पाँच जनाको लामो टेबुल वार्ता
भेटवार्ताका क्रममा कुमिन्ताङ पार्टीको तर्फबाट अध्यक्ष चङ लिवेनसहित उपाध्यक्षहरू ली छियानलोङ, चाङ रोङकङ, स्याउ सुछेन र पार्टीको थिङ्क ट्याङ्कका उपाध्यक्ष ली होङयुआन सहभागी थिए। उनीहरू अध्यक्ष चङको दायाँबायाँ पङ्क्तिबद्ध भएर बसेका थिए। अध्यक्ष चङ कुमिन्ताङ पार्टीको प्रतिनिधित्व गर्ने नीलो रङको पाइन्ट सुट र समथल जुत्तामा सजिएकी थिइन् भने उनको अनुहारको गम्भीर भावले उनले यस भेटलाई लिएको गहन गाम्भीर्यतालाई प्रस्ट झल्काउँथ्यो।

दुवै पक्षबीच करिब एक घण्टासम्म चलेको बन्द कोठाको वार्तापछि अध्यक्ष चङले आफू बसेको चाइना होटलमा अपराह्न २ बजे पत्रकार सम्मेलनको आयोजना गरी वार्ताको विवरण सार्वजनिक गर्ने कार्यक्रम रहेको छ।

चिनियाँ कम्युनिस्ट पार्टी र चिनियाँ कुमिन्ताङ पार्टीबीच १० वर्षको अन्तरालपछि भएको यो उच्चस्तरीय भेटवार्ताले दुई पक्षबीचको सम्बन्धलाई नयाँ उचाइमा पुर्याउने अपेक्षा गरिएको छ।