इजिप्टका राष्ट्रपति सिसीको भनाइ : ‘अमेरिका–इरान युद्धविरामलाई आधार बनाएर क्षेत्रीय शान्ति सुरक्षित गर्नुपर्छ’

काठमाडौं । इजिप्टका राष्ट्रपति अब्देल–फत्ताह अल–सिसीले शुक्रबार अमेरिका र इरानबीचको हालैको युद्धविरामलाई आधार बनाएर क्षेत्रीय शान्ति र स्थायित्व सुरक्षित गर्नुपर्नेमा जोड दिएका छन्। इजिप्टको राष्ट्रपति कार्यालयले एक विज्ञप्तिमा जनाए अनुसार सिसीले इटालियन प्रधानमन्त्री जोर्जिया मेलोनीसँग टेलिफोन वार्ताका क्रममा यी कुरा बताएका हुन्। वार्तामा दुई नेताबीच मध्यपूर्वको पछिल्लो घटनाक्रमबारे छलफल भएको थियो।

सिसीले वासिङ्टन र तेहरानबीच रहेका विवाद समाधान गर्न वार्ता सुरु गर्नुपर्ने आवश्यकतामा पनि जोड दिए। उनले तनाव न्यूनीकरणका लागि विभिन्न पक्षहरूसँग इजिप्टले गरेको गहन प्रयासबारे अवगत गराउँदै अरब राष्ट्रहरूको सुरक्षा र स्थायित्वप्रति इजिप्टको पूर्ण समर्थन रहेको, उनीहरूको सार्वभौमसत्ताको कुनै पनि उल्लङ्घन वा उनीहरूका जनताका स्रोतमाथि कुनै पनि खालको खतराप्रति पूर्ण अस्वीकार र निन्दा रहेको पुष्टि गरे।

इटालियन प्रधानमन्त्री मेलोनीले अन्तर्राष्ट्रिय नौसंचालनलाई शुल्क नलगाई हर्मुज जलडमरु पुनः खोल्नुको महत्व र खाडी राष्ट्रहरूको सुरक्षा कायम राख्नुपर्ने आवश्यकतामा जोड दिए। उनले इरानी आणविक कार्यक्रममा सहमति आवश्यक रहेको र युद्धको पुनरावृत्ति रोक्न सबै आवश्यक उपाय अपनाउनुपर्ने माग पनि गरिन्। मेलोनीले यी लक्ष्यहरू हासिल गर्न इजिप्टसँग सहकार्य र समन्वय बढाउने इटालीको प्रतिबद्धता पुनः पुष्टि गरिन्।

इरान र अमेरिकाबीचको दुई हप्ताको युद्धविराम बुधबारदेखि लागू भएको छ। यसै साताको अन्त्यमा पाकिस्तानको इस्लामाबादमा शान्ति वार्ता सुरु हुने तय भएको छ। इजिप्ट र इटालीका नेताहरूको यो वार्ताले अमेरिका–इरान वार्ताप्रति अन्तर्राष्ट्रिय समुदायको चासो र समर्थन रहेको संकेत गरेको छ।