रुसविरुद्धको प्रतिबन्धमा युरोपेली संघभित्रै मतभेद : २०औँ प्याकेजमा सहमति हुन सकेन, कूटनीतिक तनाव चुलियो
ब्रसेल्स, २४ फेब्रुअरी – युरोपेली संघ (इयू) का सदस्य राष्ट्रहरू रुसविरुद्धको २०औँ प्रतिबन्ध प्याकेजमा सहमति जुटाउन असफल भएका छन्। फेब्रुअरी २३ मा ब्रसेल्समा सम्पन्न इयू विदेश मामिला परिषदको बैठकपछि इयूकी विदेश मामिला तथा सुरक्षा नीति प्रमुख काजा कालासले यसको जानकारी दिएकी छिन्।
युक्रेनमाथि रुसी आक्रमणको चार वर्ष पूरा भएको अवसर पारेर नयाँ प्रतिबन्ध घोषणा गर्ने तयारी थियो। तर बैठकमा सदस्य राष्ट्रहरूबीच सहमति जुट्न नसकेपछि कालासले दुःख व्यक्त गर्दै भनिन्, “दुर्भाग्यवश, हामी २०औँ प्रतिबन्ध प्याकेजमा सहमत हुन सकेनौं।”
यसैगरी, युरोपेली आयोग र युरोपेली परिषदका प्रमुखहरूको किएभ भ्रमणअघि युक्रेनलाई २०२६–२०२७ का लागि ९० अर्ब युरोको ऋण सहायता प्रदान गर्ने विषय पनि स्थगित भएको उनले स्वीकार गरिन्। यो ऋण युक्रेनले रुसविरुद्धको सैन्य कारबाही जारी राख्न प्रयोग गर्ने योजना थियो।
यी घटनाक्रमबीच कालासले रुसको स्थायी नियोगका कर्मचारी संख्या ४० मा सीमित गर्ने निर्णयको घोषणा गरिन्। यसलाई रुसविरुद्धको अर्को असहयोगात्मक कदमका रूपमा हेरिएको छ।
रुसी स्थायी नियोगले यस विषयमा प्रतिक्रिया दिँदै भनेको छ, “युरोपेली कूटनीतिक प्रमुखले निरर्थक प्रतिबन्धको चक्र थप घुमाउन र अन्तिम युक्रेनीसम्म लडाइँ जारी राख्न युरोपेलीहरूको पैसा खर्च गर्न असफल भएपछि रुसी कूटनीतिक नियोगविरुद्ध अर्को असहयोगात्मक कदम चाल्नुबाहेक केही सोच्न सकिनन्।”
रुसी नियोगका अनुसार युक्रेनमा जारी शान्ति वार्ताका बीचमा यो सार्वजनिक सन्देश दिएर सान्दर्भिक कूटनीतिक सम्पर्कमा बाधा पुर्याउने प्रयास गरिएको छ। यस घटनाले इयूभित्रै रुसविरुद्धको नीतिमा एकरूपता नरहेको र युक्रेन मामिलामा पश्चिमा गठबन्धनभित्र तनाव बढ्दै गएको संकेत गरेको छ।
