मुसलधारे वर्षाको कहर : परवान प्रान्तमा घरको छत भत्किँदा एकै परिवारका आठ जनाको मृत्यु, दुई सातामा डेढ सयको ज्यान गयो
काबुल (अफगानिस्तान) । पूर्वी अफगानिस्तानको परवान प्रान्तमा शनिबार बिहान मुसलधारे वर्षापछि एक घरको छत भत्किँदा एकै परिवारका आठ जनाको ज्यान गएको छ भने एक जना घाइते भएका छन्। प्रान्तीय प्रहरी प्रवक्ता फजल रहिम मुस्किनयारले यसबारे जानकारी दिएका हुन्।
प्रवक्ता मुस्किनयारका अनुसार स्यागिर्द जिल्लामा बिहान सबेरै परेको भीषण वर्षापछि यो दुःखद घटना घटेको हो। यसअघि राजधानी काबुलको बगरामी क्षेत्रमा पनि यस्तै प्रकृतिको घटनामा एकै परिवारका आठ जनाको मृत्यु भएको थियो भने एक बालक घाइते भएका थिए।
अफगानिस्तानमा पछिल्ला दुई सातामा घर भत्किने र आकस्मिक बाढीजस्ता वर्षासँग सम्बन्धित घटनाहरूमा परी कम्तीमा १४८ जनाको ज्यान गइसकेको छ भने दुई सयभन्दा बढी घाइते भएका छन्। दशकौंको द्वन्द्वबाट गुज्रिएको यो मुलुकमा कमजोर पूर्वाधार र भौगोलिक विकटताका कारण प्राकृतिक विपत्तिले ठूलो जनधनको क्षति गराउने गरेको छ। प्रभावित क्षेत्रहरूमा उद्धार तथा राहत कार्य जारी रहेको अधिकारीहरूले जनाएका छन्।
