मिस्टर सुखिममा लोअर लुइङका कुशल खर्काको स्वर्णिम जित

पाक्योङ (सिक्किम) । गान्तोक जिल्लाको लोअर लुइङका कुशल खर्काले प्रतिष्ठित ‘मिस्टर सुखिम’ शारीरिक सुगठन (बडिबिल्डिङ) प्रतियोगिताको ६० केजी तौल समूहमा स्वर्ण पदक जितेर आफ्नो करियरमा नयाँ उपलब्धि थपेका छन्। रानीपुलस्थित अल्टिमेट टिम जे १३ का प्रतिनिधित्व गर्दै खर्काले मिस्टर ओलम्पिया स्वर्ण पदक विजेता जनक शर्माको प्रशिक्षण र मार्गदर्शनमा उत्कृष्ट शारीरिक बनावट र अनुशासनको प्रदर्शन गरेका थिए।

सिक्किम शारीरिक सुगठन सङ्घको आयोजनामा पाक्योङ कमिटी हलमा सम्पन्न उक्त प्रतियोगितामा राज्यभरका शीर्ष खेलाडीहरूको सहभागिता रहेको थियो। यस्तो कडा प्रतिस्पर्धाका बीच खर्काले हासिल गरेको यो जितले सिक्किमको शारीरिक सुगठन क्षेत्रमा उनको स्थानलाई थप बलियो बनाएको छ। उनको यो स्वर्णिम सफलताले उनको जिम र प्रशिक्षक दुवैका लागि गौरवको क्षण बनेको छ भने उनको बढ्दो खेल करियरमा अर्को महत्त्वपूर्ण कोशेढुङ्गा थपेको छ।