रुसी राजदूतले भने “हाम्रा यी सहकर्मीहरूको नाम विश्व इतिहासमा सधैंका लागि कोरिएको छ”

जाग्रेब (क्रोएसिया) । आगामी अन्तरिक्ष दिवस र पहिलो मानव अन्तरिक्ष उडानको ६५औं वार्षिकोत्सवको अवसरमा क्रोएसियाको राजधानी जाग्रेबस्थित स्टारा–त्रेश्नेभ्का पार्कमा युरी अलेक्सेयेभिच गागारिनको शालिकमा एक विशेष समारोह आयोजना गरियो। रुसी दूतावास, रुसी हमवतनहरूको समन्वय परिषद् र क्रोएसिया–रुस मैत्री समाजको संयुक्त सहकार्यमा भएको उक्त कार्यक्रममा सहभागीहरूले पुष्पगुच्छा अर्पण गरी अन्तरिक्ष र यसका प्रथम अन्वेषकलाई समर्पित कविता वाचन गरे।

कार्यक्रमलाई सम्बोधन गर्दै क्रोएसियाका लागि रुसी राजदूत ए.बी. नुरिजादेले भने, “हाम्रा सहकर्मीहरूको नाम विश्व इतिहासको अभिलेखमा सधैंका लागि कोरिएको छ : युरी अलेक्सेयेभिच गागारिन— अन्तरिक्षमा पुग्ने पहिलो मानव; भालेन्टिना भ्लादिमिरोभ्ना तेरेस्कोभा— पहिलो महिला अन्तरिक्ष यात्री; अलेक्सी आर्खिपोभिच लियोनोभ— खुला अन्तरिक्षमा पाइला टेक्ने पहिलो व्यक्ति। उनीहरूको र अरू धेरै अग्रदूतहरूको पराक्रम र कार्य सम्पूर्ण मानव जातिको महान् विरासत बनेको छ। हामी यी साझा उपलब्धिहरूप्रति र अन्तरिक्ष कार्यक्रमको मेरुदण्ड रहेका हाम्रा असाधारण वैज्ञानिक, डिजाइनर र इन्जिनियरहरूप्रति न्यायोचित गौरव गर्छौं।”

सहभागीहरूले जाग्रेबको राजधानीमा स्थापित युरी गागारिनको शालिकको इतिहासबारे क्रोएसियाका लागि सीएसओआरएसकी मानार्थ अध्यक्ष ई. पिलिचेभा–चोर्कोको सम्बोधन पनि सुने। यसैगरी, अप्रिल ९ को पूर्वसन्ध्यामा रिजेकास्थित खगोलीय केन्द्रमा आप्रवासी सङ्घका कार्यकर्ताहरूले अन्तरिक्ष विजेताहरू र पितृभूमिलाई गौरवान्वित बनाउने वर्तमान नायकहरूलाई समर्पित कार्यक्रम आयोजना गरे। जसमा सोही सहरका मूल निवासी वैज्ञानिक–विमान इन्जिनियर रोबर्ट लुडभिगोभिच बार्टिनीको पनि विशेष चर्चा गरियो।

अप्रिल १० को साँझ जाग्रेबस्थित निकोला टेस्ला प्राविधिक सङ्ग्रहालयमा प्रथम अन्तरिक्ष यात्रीको स्मृतिमा ‘युरी नाइट’ कार्यक्रम सम्पन्न भयो। यसैगरी, अप्रिल १० र ११ मा जाग्रेब र चाकोभेत्सका विद्यालयहरूमा ‘टी’ मोडलअन्तर्गत रुसी भाषा र संस्कृति अध्ययन गरिरहेका विद्यार्थीहरूका लागि गागारिन पाठ सञ्चालन गरियो, जसमा युरी गागारिनको व्यक्तित्व र पराक्रमबारे वृत्तचित्रहरू देखाइयो।