हङ्गेरीको चुनावी मैदानमा ओर्बानको पाँचौं कार्यकालको परीक्षा : ८१ लाख मतदाताले आज छान्नेछन् नयाँ संसद

बुडापेस्ट । हङ्गेरीमा संसदीय निर्वाचन आइतबार बिहान स्थानीय समय ६:०० बजे (०४०० जीएमटी) बाट सुरु भएको छ। राष्ट्रिय निर्वाचन कार्यालयका अनुसार यस निर्वाचनमा करिब ८१ लाख योग्य मतदाता रहेका छन्। देशभरका १० हजारभन्दा बढी मतदान केन्द्रहरूमा करिब ७६ लाख मतदाताले प्रत्यक्ष रूपमा मतदान गर्न सक्नेछन् भने हुलाकमार्फत मतदान गर्न योग्य करिब ५ लाख मतदाताले पहिल्यै मतदान सुरु गरिसकेका छन्।

स्थानीय समय साँझ ७:०० बजे (१७०० जीएमटी) सम्म जारी रहने मतदानपछि मतगणना सुरु हुनेछ र प्रारम्भिक नतिजा राति नै आउने अपेक्षा गरिएको छ। यस निर्वाचनमा कुल पाँचवटा दल वा गठबन्धनहरू प्रतिस्पर्धामा छन्। पछिल्ला जनमत सर्वेक्षणहरूले प्रधानमन्त्री भिक्टर ओर्बान नेतृत्वको सत्तारूढ गठबन्धन फिडेज र क्रिस्चियन डेमोक्रेटिक पिपुल्स पार्टी तथा पिटर माग्यार नेतृत्वको विपक्षी दल तिसा पार्टीप्रति अपेक्षाकृत बलियो समर्थन देखाएका छन्।

साना दलहरूमध्ये दक्षिणपन्थी चरमपन्थी ‘आवर होमल्याण्ड मुभमेन्ट’ लाई संसदमा प्रवेश गर्ने सम्भावना रहेको मानिएको छ भने डेमोक्रेटिक कोलिसन र हङ्गेरियन टु–टेल्ड डग पार्टीलगायत अन्य दलहरूले भने चुनावी सीमा पार गर्ने सम्भावना कम रहेको ठानिएको छ।

यो निर्वाचन सन् २०१० मा पुनः सत्तामा फर्किएयता ओर्बानको चौथो संसदीय प्रतिस्पर्धा हो, जसको परिणामले उनले लगातार पाँचौं कार्यकाल सुरक्षित गर्न सक्छन् कि सक्दैनन् भन्ने निर्धारण गर्नेछ। हङ्गेरीको निर्वाचन कानुनअनुसार संसदीय निर्वाचन प्रत्येक चार वर्षमा हुन्छ। हङ्गेरीको संसदमा १९९ सिट रहेको छ, जसमध्ये १०६ सिट एकल सदस्यीय निर्वाचन क्षेत्रबाट प्रत्यक्ष निर्वाचनमार्फत भरिन्छन् भने ९३ सिट संसदमा प्रवेश गर्ने दलहरूबीच बाँडिन्छ। बहुमत सिट प्राप्त गर्ने दल वा गठबन्धनले सरकार गठन गर्ने अधिकार पाउनेछ।