चीन–उत्तर कोरिया ‘रणनीतिक एकता’तर्फ: बहुध्रुवीय विश्वमा किमको समर्थन
प्योङयाङ। उत्तर कोरियाली सर्वोच्च नेता किम जोङ उन र चिनियाँ विदेशमन्त्री वाङ यीबीच प्योङयाङमा महत्वपूर्ण भेटवार्ता सम्पन्न भएको छ। भेटका क्रममा किमले चीनले अघि सारेको ‘बहुध्रुवीय विश्व’ निर्माणको अभियानमा पूर्ण समर्थन जनाउँदै दुई देशबीचको सम्बन्धलाई अझ प्रगाढ बनाउन आह्वान गरेका छन्।
उत्तर कोरियाको सरकारी सञ्चारमाध्यम केसीएनएका अनुसार, किमले ताइवानलाई चीनको अभिन्न अंग मान्ने ‘एक चीन नीति’ प्रति आफ्नो सरकारको अडिग समर्थन रहने स्पष्ट पारेका छन्। उनले वर्तमान भू-राजनीतिक अस्थिरताका बीच दुई देशबीचको सहकार्य र दिगो विकास झन् आवश्यक भएको बताएका छन्।
सात वर्षपछि पहिलोपटक प्योङयाङ पुगेका वाङ यीले गत वर्ष किम र चिनियाँ राष्ट्रपति सी चिनफिङबीच भएको शिखर वार्तापछि द्विपक्षीय सम्बन्ध ‘नयाँ चरण’ मा प्रवेश गरेको उल्लेख गरे। अमेरिका र उसका सहयोगी राष्ट्रहरूसँग बढ्दो तनावका बीच किमले ‘नयाँ शीतयुद्ध’ को सन्दर्भमा रुस र चीनसँगको सम्बन्धलाई तीव्रता दिएका छन्।
यो भेटलाई आगामी समयमा हुने अमेरिकी राष्ट्रपति डोनाल्ड ट्रम्पको चीन भ्रमणअघि महत्वपूर्ण राजनीतिक घटनाक्रमका रूपमा हेरिएको छ। साथै, कोरोना महामारीपछि पुनः सञ्चालनमा आएका हवाई र रेल सेवाले दुई परम्परागत मित्र राष्ट्रबीचको आर्थिक तथा कूटनीतिक सम्बन्धलाई थप मजबुत बनाउने अपेक्षा गरिएको छ।
