नाइजर नदीमा चिनियाँ कम्पनीको इन्जिनियरिङ चमत्कार

बायेल्सा (नाइजेरिया) । नाइजेरियाको दक्षिणी राज्य बायेल्सास्थित नुन नदीमाथि चिनियाँ कम्पनीले निर्माण गरेको ६३० मिटर लामो ऐतिहासिक पुलको शुक्रबार राष्ट्रपति बोला टिनुबुले औपचारिक उद्घाटन गरेका छन्। चीन सिभिल इन्जिनियरिङ कन्स्ट्रक्सन कर्पोरेसन (सीसीईसीसी) द्वारा निर्मित ओपोरोमा पुलले देशको डेल्टा क्षेत्रमा सम्पर्क सञ्जाल र सामाजिक–आर्थिक एकीकरणको क्षेत्रमा एउटा प्रमुख कोशेढुङ्गा पार गरेको छ।

चीन र नाइजेरियाबीचको पूर्वाधार सहकार्यको ढाँचाअन्तर्गत एक प्रमुख परियोजनाको रूपमा मान्यता प्राप्त यो पुलले दक्षिणी इजाउ स्थानीय सरकार क्षेत्रको सदरमुकाम ओपोरोमालाई पहिलो पटक सडक यातायातको पहुँच प्रदान गरेको छ। नदी किनारमा रहेको यो समुदाय ६० वर्षभन्दा लामो समयदेखि सडक यातायातको पहुँचविहीन रही पूर्ण रूपमा जल यातायातमा मात्र निर्भर थियो।

उद्घाटन समारोहमा राष्ट्रपति टिनुबुले यस परियोजनालाई “रूपान्तरणकारी” को संज्ञा दिँदै भने, “समुदायहरूलाई जोड्ने यो पुलले यस पश्चिम अफ्रिकी मुलुकका लागि अवसर, रोजगारी र आशाको सिर्जना गर्नेछ।” स्थानीय बासिन्दा र समुदायका नेताहरूले यस परियोजनालाई “जीवनरेखा” को रूपमा प्रशंसा गरेका छन्। उनीहरूका अनुसार यसले विशेषगरी राज्यको राजधानी येनागोआसँग जोडिएका तेल उत्पादक समुदायहरूका लागि वस्तु तथा सेवा ढुवानीको लागतमा भारी कमी ल्याउनेछ।

सीसीईसीसीका एक प्रतिनिधिले उद्घाटन समारोहमा भने, “चिनियाँ कम्पनीले इमानदारी, ठोस परिणाम, मित्रता र सद्भावनाको भावनाका साथ नाइजेरियासँग पूर्वाधार विकास र जनजीविका सुधारमा सहकार्यलाई निरन्तर गहिरो बनाउँदै लैजानेछ र उच्च गुणस्तरीय आर्थिक तथा सामाजिक वृद्धिको खोजीमा नाइजेरियालाई योगदान पुर्याउनेछ।”