सिलिगुडीमा अन्तर्राष्ट्रिय साइबर ठगी गिरोहको पर्दाफाश : यूएसडीटी क्रिप्टोकरेन्सीको नाममा लाखौं ठग्ने ८ जना पक्राउ

सिलिगुडी (पश्चिम बङ्गाल) । प्रधान नगर प्रहरी चौकीको टोलीले यूएसडीटी क्रिप्टोकरेन्सीको आडमा सञ्चालित एक अन्तर्राष्ट्रिय साइबर ठगी गिरोहको पर्दाफाश गर्दै यस सम्बन्धमा ८ जनालाई पक्राउ गरेको छ। पक्राउ पर्नेहरूमा राकेश मजुमदार (३०), प्रेम भद्र (२४), राजकुमार चौधरी (२६), अनीश चौधरी (२२), विवेक प्रधान (२६), मो. मोइनुद्दीन (२६), मनिष चौधरी (२४) र रोहन चौधरी (२५) रहेका छन्। उनीहरूमध्ये अधिकांश अलिपुरद्वार, दार्जिलिङ र जयगाउँका बासिन्दा हुन्।

प्रहरी स्रोतका अनुसार उक्त गिरोहले भारत तथा विदेशका पीडितहरूलाई निशाना बनाउन विभिन्न व्यक्तिका बैंक खाताहरूको प्रयोग गरी यूएसडीटी क्रिप्टोकरेन्सीसँग सम्बन्धित अनलाइन प्लेटफर्ममार्फत लाखौं रुपैयाँ ठगी गर्ने गरेको थियो। आरोपीहरूले पीडितहरूलाई अनलाइनमार्फत यूएसडीटी बिक्री गर्ने प्रलोभन देखाउने र रकम खातामा जम्मा भएपछि तुरुन्तै निकालेर सम्बन्धित बैंक खाता बन्द गर्ने गरेको खुलासा भएको छ।

प्रहरी कारबाहीका क्रममा आरोपीहरूको साथबाट ५८ वटा एटीएम कार्ड, १८ वटा पासबुक, ८ वटा चेकबुक र १० वटा मोबाइल फोन बरामद गरिएको छ। बरामद गरिएका मोबाइल फोनहरूबाट अनुसन्धानकर्ताहरूले धेरै महत्त्वपूर्ण सुराकहरू प्राप्त गरेका छन्, जसको आधारमा थप अनुसन्धान अघि बढाइएको छ।

प्रहरी स्रोतका अनुसार धेरै राज्यका साइबर प्रहरी इकाइहरूले यस गिरोहलाई केही समयदेखि ट्रयाक गरिरहेका थिए। सूचनाको आधारमा अधिकारीहरूले सिलिगुडीको प्रधान नगर क्षेत्रस्थित एक घरमा छापा मारी सबै ८ जना आरोपीहरूलाई पक्राउ गरेका हुन्। आरोपीहरूविरुद्ध ठगीको मुद्दा दर्ता गरी उनीहरूलाई सिलिगुडी अदालतमा पेश गरिएको छ। प्रहरीले गिरोहबारे थप अनुसन्धानका लागि उनीहरूको रिमान्ड माग गरेको छ।