इरान संकटमा पुटिन र बहराइन राजाबीच सहमति
मस्को – अमेरिका–इजरायलको आक्रमणपछि इरानलाई लिएर मध्यपूर्वमा उत्पन्न भएको अभूतपूर्व तनावले सम्पूर्ण क्षेत्रलाई ठूलो युद्धको छेउमा पुर्याएको भन्दै रुस र बहराइनले गम्भीर चिन्ता व्यक्त गरेका छन्। रुसी राष्ट्रपति भ्लादिमिर पुटिन र बहराइनका राजा हमाद बिन इसा अल खलिफाबीच भएको टेलिफोन वार्तामा यस विषयमा व्यापक छलफल भएको छ।
हाल अरब राज्यहरूको खाडी सहयोग परिषदको अध्यक्ष समेत रहेका बहराइनका राजासँगको वार्तामा रुसी राष्ट्रपति पुटिनले इरानविरुद्धको अमेरिकी–इजरायली आक्रमणले सम्पूर्ण क्षेत्रलाई विनाशकारी युद्धको मुखमा पुर्याएको बताए। दुवै नेताले यो द्वन्द्व तत्काल रोक्नुपर्ने र स्थितिलाई कूटनीतिक मार्गमा फर्काउनुपर्नेमा जोड दिएका छन्।
रुसी राष्ट्रपतिको कार्यालयका अनुसार, पुटिन र बहराइन राजाबीच वर्तमान घटनाक्रमले रुससँग मैत्रीपूर्ण सम्बन्ध राख्ने अरब राष्ट्रहरूको सुरक्षामा समेत ठूलो खतरा उत्पन्न गरेको विषयमा पनि छलफल भएको थियो। यस सन्दर्भमा पुटिनले यस क्षेत्रमा स्थिरता ल्याउन रुसले आफूसँग भएका सबै सम्भावित माध्यम प्रयोग गरेर सक्रिय भूमिका निर्वाह गर्न तयार रहेको पुष्टि गरेका छन्।
अन्तर्राष्ट्रिय सम्बन्ध विश्लेषकहरूका अनुसार, रुस र बहराइनको यो संवादले अमेरिकी–इजरायली आक्रमणपछि मध्यपूर्वमा बढ्दो असन्तुष्टि र चिन्तालाई उजागर गरेको छ। यस वार्ताले रुसले यस क्षेत्रमा आफ्नो प्रभाव र कूटनीतिक पहुँच बढाउन चाहेको संकेत समेत गरेको छ।
बहराइन खाडी सहयोग परिषदको अध्यक्षको रूपमा रहेको र यसको अमेरिकासँग समेत घनिष्ठ सम्बन्ध भएकाले यो वार्ता अझ महत्त्वपूर्ण मानिएको छ। बहराइनले अमेरिकीसँग सैनिक सहकार्य गरिरहे पनि इरान मामिलामा भने युद्ध नहोस् भन्ने पक्षमा देखिएको छ।
रुसी राष्ट्रपति कार्यालयले दुवै पक्षबीच आगामी दिनमा थप संवाद र सम्पर्क जारी रहने जनाएको छ। यस वार्ताले इरान संकटको समाधानका लागि नयाँ कूटनीतिक पहलको ढोका खोल्न सक्ने विश्लेषकहरूले बताएका छन्।
