भियतनाम र स्लोभाकियाबीच सम्बन्ध स्तरोन्नति

हनोई । भियतनामी प्रधानमन्त्री ले मिन्ह हुङ र उनका स्लोभाक समकक्षी रोबर्ट फिकोले सोमबार द्विपक्षीय सम्बन्धलाई रणनीतिक साझेदारीमा स्तरोन्नति गर्ने सहमति गरेका छन्। भियतनाम समाचार एजेन्सीका अनुसार स्लोभाक प्रधानमन्त्रीको दक्षिणपूर्वी एसियाली मुलुकको औपचारिक भ्रमणकै क्रममा यो सहमति भएको हो।

प्रतिवेदनअनुसार वार्तापछि आयोजित पत्रकार सम्मेलनमा प्रधानमन्त्री हुङले आफू र आफ्ना स्लोभाक अतिथिले सम्बन्ध स्तरोन्नतिसम्बन्धी संयुक्त वक्तव्य जारी गरेको र नयाँ साझेदारी कार्यान्वयनका लागि शीघ्र कार्ययोजना विकास गर्न दुवै देशका विदेश मन्त्रालयहरूलाई जिम्मेवारी दिइएको बताए।

प्रधानमन्त्री हुङले दुवै पक्षले व्यापार, लगानी, रक्षा र सुरक्षा, विज्ञान तथा प्रविधि, नवप्रवर्तन, डिजिटल रूपान्तरण र जनस्तरको आदानप्रदानलगायतका क्षेत्रहरूमा साझेदारीलाई गहिरो बनाउने सहमति गरेको जानकारी दिए। प्रतिवेदनमा थप भनिएको छ कि स्लोभाक प्रधानमन्त्री फिकोले द्विपक्षीय राजनीतिक सम्बन्ध बलियो र पारस्परिक रूपमा लाभदायक रहेको पुष्टि गर्दै भियतनाम स्लोभाकियाको दक्षिणपूर्वी एसियामा सबैभन्दा ठूलो व्यापार साझेदार रहेको उल्लेख गरे र अझ बलियो आर्थिक तथा व्यापार सहकार्यको आह्वान गरे।