विश्व मञ्चमा चिनियाँ ‘दुई सत्र’को रणनीतिक अर्थ

# मुना चन्द

बेइजिङमा हरेक वसन्त ऋतुमा आयोजना हुने चिनियाँ ‘दुई सत्र’ (राष्ट्रिय जन कांग्रेस र चिनियाँ जन राजनीतिक सल्लाहकार सम्मेलन) को बैठक अहिले विश्वकै ध्यानको केन्द्र बनेको छ। मार्च ४ र ५ तारीखदेखि सुरु हुने यी बैठकहरू केवल आन्तरिक नीति निर्माणको औपचारिकता मात्र होइन, बरु सम्पूर्ण विश्वले चीनको शासन प्रणाली, आर्थिक गन्तव्य र भविष्यको रणनीति बुझ्ने एउटा सशक्त मञ्च हो।

यस पटकको दुई सत्रले विश्व अर्थतन्त्र मन्दीको चपेटामा रहेका बेला चीनले आफ्नो व्यापक आर्थिक लक्ष्यहरू कसरी प्राप्त गर्ने भन्ने योजना सार्वजनिक गर्नेछ। चीनले अन्तर्राष्ट्रिय स्तरमै तुलनात्मक रूपमा व्यवस्थित रहेको वित्तीय घाटा अनुपातलाई नियन्त्रणमा राख्दै लचिलो राजकोषीय उपकरणहरू परिचालन गरिरहेको छ। यसको उद्देश्य दीर्घकालीन वित्तीय स्थिरतामा सम्झौता नगरी क्रमिक रूपमा विस्तारवादी अर्थतन्त्रलाई बढावा दिनु हो।

विश्व व्यापारमा आएको चुनौतीपूर्ण अवस्थाका बाबजुद चीनको वस्तु व्यापार सन् २०२५ मा ४० ट्रिलियन युआन पार गर्न सफल भएको छ, जसले झण्डै १२० भन्दा बढी देश र क्षेत्रका लागि चीन सबैभन्दा ठूलो व्यापारिक साझेदार बनेको छ। बेल्ट एण्ड रोड पहल जस्ता परियोजनाहरूले विश्वव्यापी सम्पर्क र विकासलाई नयाँ उचाइमा पुर्याएका छन्। यसै सन्दर्भमा, दुई सत्रले चीनको उच्च-स्तरीय खुलापन, विदेशी लगानी प्रवर्द्धन र वैश्विक शासन सुधारमा सक्रिय सहभागिताको प्रतिबद्धतालाई पुनः पुष्टि गर्ने अपेक्षा गरिएको छ।

तर दुई सत्रको महत्त्व आर्थिक नीतिभन्दा पनि गहिरो छ। यसले चीनको संस्थागत आत्मविश्वासलाई दर्शाउँछ। जहाँ धेरै देशहरूमा नीतिगत उतारचढाव र जनमतको चक्रवात देखिन्छ। त्यहाँ चीनले संरचित परामर्श, तथ्यांकमा आधारित विश्लेषण र दीर्घकालीन रणनीतिक एकताका माध्यमबाट आफ्नो दिशा निर्धारण गर्दछ। यही निरन्तरता नै हो, जसले चीनलाई विश्वव्यापी आर्थिक संकट, महामारी र भूराजनीतिक अनिश्चितताका बेला पनि स्थिर रहन मद्दत गरेको छ।

विश्वका लागि, दुई सत्र केवल एउटा बैठक होइन, यो चीनको विकास यात्राको एउटा दर्पण हो। यसले स्थिरता, समावेशीकरण र दिगो विकासमा आधारित आधुनिकीकरणको व्यापक कथालाई मूर्त रूप दिन्छ। अराजकता र विखण्डनको चपेटामा फसेको विश्वमा, चीनको दुई सत्रले सन्देश दिनेछ– स्थिर शासन, दूरदर्शी योजना र साझा विकासलाई अँगाल्दै चीनले आफ्नो राष्ट्रिय रणनीतिलाई अघि बढाइरहेको छ।

नेपालजस्तो विकासशील र हिमाली छिमेकीका लागि यी बैठकहरूको गम्भीर अवलोकन आवश्यक छ। किनकि चीनको आर्थिक गति र नीतिगत दिशाले हिमालय पारिको सम्बन्ध, लगानी र पूर्वाधार विकासमा प्रत्यक्ष प्रभाव पार्नेछ। स्थिरताको यही सङ्गीत नै चीनको रणनीतिक यात्राको मूल मन्त्र हो।