गृहमन्त्री अर्यालको दाबी : निर्वाचन सुरक्षा पूर्ण, स्वच्छ र भयरहित मतदानको वातावरण तय
काठमाडौं – गृहमन्त्री ओमप्रकाश अर्यालले बिहीबार हुने प्रतिनिधिसभा सदस्य निर्वाचनका लागि देशभरि मतदान सुरक्षा पूर्ण रूपमा सुनिश्चित गरिएको जानकारी दिएका छन्। आसन्न निर्वाचनका सन्दर्भमा समग्र शान्ति सुरक्षा र तयारीबारे गृह मन्त्रालयमा सञ्चारकर्मीसँगको अन्तरक्रियाका क्रममा नेपाल सरकारका प्रवक्ता समेत रहेका गृहमन्त्री अर्यालले यसपटकको निर्वाचन पहिलेभन्दा बढी सुदृढ, स्वच्छ र भयरहित हुने विश्वास व्यक्त गरे।
गृहमन्त्री अर्यालले भने, “सबै सुरक्षा संयन्त्रहरू मतदानस्थलसम्म परिचालित भइसकेका छन्। आवश्यक परेको खण्डमा सहज नियन्त्रणको लागि सबै तयारी छ।” उनले निर्वाचनका क्रममा कुनै अवैध गतिविधि भए कानुनी कारबाही गर्ने र दोषीलाई अदालतमा पेस गरिने स्पष्ट पारे। यसका लागि नेपाल प्रहरी, सशस्त्र प्रहरी बल र आवश्यक परेमा नेपाली सेनाले सुरक्षा सहायता प्रदान गर्ने योजनाबारे समेत जानकारी दिए।
गृहमन्त्री अर्यालले मतदातालाई सुझबुझका साथ मतदान गर्न आग्रह गर्दै भने, “निर्वाचनले प्रतिनिधि छान्ने मात्र नभई राजनीतिक सुशासन कायम गर्न महत्त्वपूर्ण योगदान दिनेछ। मतदाताले सुझबुझका साथ मतदान गर्नुहुनेछ।”
मतपत्र व्यवस्थापन प्रक्रिया विगतमा झैं एकीकृत निर्वाचन सुरक्षा योजनाअनुरुप हुने स्पष्ट पार्दै उनले मतदान समाप्त भएपछि मतपेटिका सम्बन्धित निर्वाचन कार्यालयमा ल्याउने व्यवस्था पनि सुरक्षित रूपमा योजनाअनुरुप नै हुने बताए।
