सी चिनफिङद्वारा मध्यपूर्व शान्तिका लागि चारबुँदे प्रस्ताव, अबुधाबी क्राउन प्रिन्ससँग भेटवार्ता
बेइजिङ । चिनियाँ राष्ट्रपति सी चिनफिङले मंगलबार बेइजिङमा संयुक्त अरब इमिरेट्सका अबुधाबी क्राउन प्रिन्स शेख खालेद बिन मोहम्मद बिन जायद अल नाहयानसँगको भेटवार्तामा मध्यपूर्वको शान्ति तथा स्थायित्व प्रवर्द्धनका लागि चारबुँदे प्रस्ताव अघि सारेका छन्।
उक्त प्रस्तावमा शान्तिपूर्ण सहअस्तित्वको सिद्धान्तको पालना, राष्ट्रिय सार्वभौमसत्ताको सिद्धान्तको पालना, अन्तर्राष्ट्रिय कानुनको सिद्धान्तको पालना, र विकास तथा सुरक्षाको समन्वयको पालना गर्नुपर्ने उल्लेख छ।
भेटवार्ताका क्रममा दुवै नेताले द्विपक्षीय सम्बन्ध तथा क्षेत्रीय घटनाक्रमबारे समेत छलफल गरेको चिनियाँ विदेश मन्त्रालयले जनाएको छ। मध्यपूर्वमा बढ्दो तनावका बीच चीनले शान्ति प्रक्रियामा सक्रिय भूमिका खेल्न चाहेको यस प्रस्तावले संकेत गरेको छ।
यसअघि पनि चीनले इरान–साउदी कूटनीतिक सम्बन्ध पुनर्स्थापनामा मध्यस्थता गरेको थियो। संयुक्त अरब इमिरेट्सका क्राउन प्रिन्सले चीनको यो प्रस्तावप्रति सकारात्मक प्रतिक्रिया व्यक्त गरेको बताइएको छ।
भेटवार्तामा दुई देशबीचको आर्थिक तथा लगानी सहकार्यका विषयमा पनि छलफल भएको थियो। चीन मध्यपूर्वको एक महत्वपूर्ण व्यापारिक साझेदार रहेको छ। यस क्षेत्रको स्थायित्व चीनको लागि पनि रणनीतिक रूपमा महत्वपूर्ण मानिन्छ।
