पाँचबुँदे शान्ति पहलमा चीन-पाकिस्तान सहकार्य : ‘युद्धविराम जोगाउनु अहिलेको मुख्य चुनौती’

बेइजिङ — अप्रिल १३ तारिखका दिन चिनियाँ कम्युनिष्ट पार्टीको केन्द्रिय समितिका सदस्य एवम् परराष्ट्र मन्त्री वाङ यीले पाकिस्तानी उपप्रधानमन्त्री एवम् परराष्ट्र मन्त्री मोहम्मद इशाक डारसँग टेलिफोन वार्ता गर्नुभएको छ। उक्त कुराकानीका क्रममा पाकिस्तानी पक्षले इरान र अमेरिकाबीच जारी वार्ताको मध्यस्थता सम्बन्धी पूर्ण विवरण प्रस्तुत गरेको थियो।

उपप्रधानमन्त्री डारले क्षेत्रीय शान्तिका लागि चीनले निरन्तर गरिरहेको प्रयासप्रति विशेष धन्यवाद ज्ञापन गर्नुभयो। उहाँले क्षेत्रमा दिगो शान्ति स्थापनाको लक्ष्य हासिल गर्न चीनसँग घनिष्ठ परामर्श र सहकार्य गर्न पाकिस्तान सदैव इच्छुक रहेको र यस दिशामा सकारात्मक भूमिका निर्वाह गरिरहने प्रतिबद्धता व्यक्त गर्नुभयो।

जवाफमा परराष्ट्र मन्त्री वाङ यीले यस विषयमा चीनको सैद्धान्तिक अडान तथा दृष्टिकोणलाई पुनः दोहोर्याउनुभयो। उहाँले अमेरिका र इरानबीचको तनावपूर्ण अवस्थामा युद्धविराम कायम गर्न तथा मध्यस्थताको भूमिका निर्वाह गर्न पाकिस्तानले गरेको प्रयास र इस्लामाबाद वार्ताप्रति देखाएको प्रतिबद्धताको खुलेर प्रशंसा गर्नुभयो।

वाङ यीले वर्तमान अवस्थाको गम्भीरतातर्फ संकेत गर्दै भन्नुभयो, “हालको युद्धविरामको परिस्थिति निकै कमजोर रहँदा क्षेत्रीय परिस्थिति एउटा महत्त्वपूर्ण संक्रमणकालीन मोडमा उभिएको छ। यस घडीको अत्यावश्यक कार्य भनेको युद्ध पुनः सुरु हुन नदिनु र कठिन प्रयासपछि प्राप्त भएको यो युद्धविरामलाई जोगाएर राख्नु हो।”

उहाँले अन्तर्राष्ट्रिय समुदायलाई शान्ति वार्ताका लागि अनुकूल वातावरण निर्माण गर्न एकजुट भई प्रयास गर्न आग्रह गर्नुभयो। उहाँले युद्धविरामलाई कमजोर पार्ने, परिस्थितिलाई उग्र बनाउने वा टकराव चर्काउने कुनै पनि गतिविधिको स्पष्ट शब्दमा विरोध गर्नुपर्नेमा जोड दिनुभयो।

वाङ यीले खाडी क्षेत्र तथा मध्यपूर्वमा शान्ति र स्थिरताको पुनरुत्थान गर्न चीन र पाकिस्तानले अघि सारेका पाँचबुँदे पहलहरूले अन्तर्राष्ट्रिय समुदायको साझा सहमति र आकांक्षालाई प्रतिबिम्बित गर्ने बताउनुभयो। उहाँका अनुसार यी पहलहरूले नै वर्तमान जटिल परिस्थितिलाई समाधानको दिशातर्फ डोर्याउन सक्छन्।

“चीनले पाकिस्तानले आगामी दिनहरूमा यस विषयमा अझ बढी सक्रिय र सकारात्मक भूमिका खेल्ने अपेक्षा गर्दछ,” वाङ यीले भन्नुभयो। उहाँले पाकिस्तान र सम्पूर्ण अन्तर्राष्ट्रिय समुदायसँग मिलेर मध्यपूर्व क्षेत्रमा शीघ्रातिशीघ्र शान्ति र स्थिरताको पुनःस्थापना गर्न चीन निरन्तर र सक्रिय योगदान गर्न इच्छुक रहेको प्रतिबद्धता व्यक्त गर्नुभयो।