रूस–हंगेरी सम्बन्ध : पुटिनद्वारा दुई हंगेरी नागरिक रिहा, ऊर्जा सहकार्यबारे छलफल
मस्को — रूसी राष्ट्रपति भ्लादिमिर पुटिनले हंगेरीका विदेश मन्त्री पिटर सिजार्टोसँग क्रेमलिनमा भएको भेटवार्तामा दुई हंगेरी नागरिकलाई रिहा गर्ने निर्णय गरेका छन्। बुधबार भएको सो भेटमा दुई देशबीचको ऊर्जा सहकार्य र व्यापारिक सम्बन्धबारे पनि छलफल भएको छ।
रूसी राष्ट्रपति पुटिनले हंगेरीका प्रधानमन्त्री भिक्टर अर्बानसँग टेलिफोन वार्तामा उठेको विषयलाई सम्बोधन गर्दै युक्रेनी सेनामा अनिवार्य भर्ती गरिएका दुई हंगेरी–युक्रेनी दोहोरो नागरिकता भएका व्यक्तिलाई रिहा गर्ने निर्णय गरेको जानकारी दिए। पुटिनले भने, “हिजो प्रधानमन्त्री अर्बानसँगको टेलिफोन वार्तामा उहाँले यो मुद्दा उठाउनुभएको थियो। उहाँको अनुरोधअनुसार नै हामीले दुई जनालाई रिहा गर्ने निर्णय गरेका छौं। तपाईंले उनीहरूलाई आफूसँगै बुडापेस्ट लैजान सक्नुहुनेछ।”
वार्तामा रूसी विदेश मन्त्री सर्गेई लाभरोभ, उपप्रधानमन्त्री डेनिस मान्टुरोभ र राष्ट्रपतिका सहायक युरी उशाकोभ पनि सहभागी थिए।
दुई देशबीचको व्यापारिक सम्बन्धबारे चर्चा गर्दै पुटिनले गत वर्ष व्यापारमा १३ प्रतिशतले गिरावट आए पनि समग्र सम्बन्ध सकारात्मक रहेको बताए। उनले भने, “हाम्रो व्यापार कारोबार केही घटेको छ, तर सम्बन्ध भने स्थिर र सकारात्मक छ। विशेषगरी ऊर्जा नीति, हाइड्रोकार्बन आपूर्ति र हाम्रो प्रमुख आयोजना पाक्स आणविक ऊर्जा केन्द्रको निर्माणमा सहकार्य जारी छ।”
रूसी राष्ट्रपतिले युरोपेली ग्यास बजारमा देखिएको अस्थिरताप्रति चिन्ता व्यक्त गर्दै रूस भरपर्दो आपूर्तिकर्ता रहेको बताए। उनले भने, “हामी सधैं आफ्नो दायित्व पूरा गर्छौं र गर्न तयार छौं। सबै कुरा हाम्रो नियन्त्रणमा नहोला, तर हामी भरपर्दो साझेदार हौं।”
सिजार्टोको यो भ्रमणले दुई देशबीचको कूटनीतिक र आर्थिक सम्बन्धलाई थप प्रगाढ बनाउने अपेक्षा गरिएको छ। रूस र हंगेरीबीच ऊर्जा क्षेत्रमा लामो समयदेखि सहकार्य रहँदै आएको छ।
