रुकुम पूर्वमा निर्वाचन प्रहरीको असन्तुष्टि, समान व्यवहारको माग गर्दै विरोध
रुकुम पूर्व — रुकुम पूर्वमा निर्वाचन सुरक्षामा खटिएका प्रहरीबीच असन्तुष्टि चुलिँदा केही निर्वाचन प्रहरी आन्दोलित बनेका छन्। समान व्यवहार नभएको र केही व्यक्तिलाई विशेष सुविधा दिइएको आरोप लगाउँदै उनीहरू जिल्ला प्रहरी कार्यालय अगाडि विरोधमा उत्रिएका हुन्।
प्राप्त जानकारी अनुसार जिल्ला प्रहरी कार्यालय रुकुम पूर्वको कार्यालय अगाडि केही निर्वाचन प्रहरीले विरोध प्रदर्शन गरिरहेका छन्। उनीहरूको आरोप अनुसार तीन जना निर्वाचन प्रहरीले ड्युटी नगरी नै तलब तथा भत्ता बुझेको भन्दै अन्य निर्वाचन प्रहरी असन्तुष्ट बनेका हुन्।
आन्दोलनमा उत्रिएका प्रहरीहरूले निर्वाचनमा खटिने सबै प्रहरीलाई समान व्यवहार र पारदर्शिता अपनाउनुपर्ने माग गरेका छन्। उनीहरूका अनुसार ड्युटी नगरी भत्ता बुझ्ने व्यवस्था भएमा इमानदारीपूर्वक काम गरिरहेका अन्य प्रहरीमाथि अन्याय हुने बताइएको छ।
यस घटनापछि जिल्ला प्रहरी प्रशासनले स्थिति सामान्य बनाउन प्रयास गरिरहेको छ। प्रहरी अधिकारीहरूले आन्दोलित बनेका निर्वाचन प्रहरीलाई सम्झाइ–बुझाइ गरेर समस्या समाधान गर्ने प्रयास गरिरहेको जनाइएको छ।
हाल निर्वाचनको संवेदनशील समयमा उत्पन्न भएको यो असन्तुष्टिलाई संवादमार्फत समाधान गर्ने प्रयास भइरहेको बताइएको छ। प्रशासनले स्थिति नियन्त्रणमा रहेको र निर्वाचन सुरक्षामा कुनै अवरोध नआउने गरी व्यवस्थापन गरिने जनाएको छ।
