सञ्चारकर्मी राजनीति: सपनामा त कमाल, मतगणनामा निराशा
काठमाडौं / रौतहट र धनुषामा सञ्चारकर्मीका रूपमा लोकप्रियता कमाएका ऋषि धमला र दिवाकर साहले राजनीतिक रंगमञ्चमा होमिए पनि मतपरिणामले दयनीय अवस्था देखाएको छ।
रौतहट क्षेत्र नं. ४ बाट उम्मेदवार बनेका ऋषि धमला मतगणनामा पछाडि परेको समाचार छ। अहिलेसम्म उनले केवल ५६ मत मात्र प्राप्त गरेका छन्। त्यहाँ रास्वपाका गणेश पौडेल ४ हजार ७ सय ४४ मतसहित अग्रता लिइरहेका छन् भने कांग्रेसका देवप्रसाद तिमल्सेना १ हजार ६ सय ८८ मतसहित दोस्रो र नेकपाका रामकुमार भट्टराई १ हजार ६ सय १२ मतसहित तेस्रो स्थानमा छन्। धमलाका लागि त सय मतको आँकडा पनि पुग्न मुस्किल देखिएको छ।
धनुषा क्षेत्र नं. ३ बाट स्वतन्त्र उम्मेदवार बनेका युट्युबर दिवाकर साहको अवस्था पनि उस्तै निराशाजनक देखिएको छ। मतगणना सुरु हुनु अघि नै उनले हार स्वीकार गरिसकेका छन् र रिपोर्टिङसमेत शुरु गरेका छन्। उनको निर्वाचन क्षेत्रमा रास्वपाका मनिष झाले २३ हजार ३ सय ११ मतसहित अग्रता लिइरहेका छन्।
सञ्चारकर्मीको लोकप्रियता र डिजिटल प्रभावले राजनीतिमा प्रवेश सहज बनाउँछ जस्तो देखिए पनि, मतपरिणामले देखाएको वास्तविकता भने फरक रहेछ।
