विजयभन्दा जिम्मेवारी रोजे बालेनले : जुलुस त्यागेर सिधै काममा लाग्ने घोषणा
विराटनगर — प्रतिनिधिसभा सदस्य निर्वाचनको मतगणनामा नेकपा एमालेका अध्यक्ष केपी शर्मा ओलीलाई भारी मतान्तरले पछि पार्दै जित लगभग निश्चित बनाएका राष्ट्रिय स्वतन्त्र पार्टी (रास्वपा) का वरिष्ठ नेता बालेन शाहले विजय जुलुस नगर्ने घोषणा गरेका छन्।
शुक्रबार बिहान श्री एयरलाइन्सको उडानबाट विराटनगर ओर्लिएका शाहले समर्थकलाई संयमित रहन आग्रह गर्दै कुनै पनि प्रकारको विजयोत्सव वा जुलुस आयोजना नगर्ने बताएका हुन्।
शाहले मतगणना प्रक्रियामा अनावश्यक भीडभाड, होहल्ला वा अवरोध नहोस् भन्ने उद्देश्यले आफू मतगणना स्थलसमेत नजाने निर्णयमा पुगेको जानकारी दिएका छन्। उनका अनुसार चुनाव जित्नु अन्तिम लक्ष्य नभई जनताको विश्वासअनुसार काम गर्नु नै वास्तविक जिम्मेवारी हो।
“विजय जुलुसभन्दा काम महत्वपूर्ण छ,” भन्ने सन्देशसहित उनले सीधै काममा लाग्ने तयारी गरेको बताएका छन्।
बालेनको यो शैलीलाई उनका समर्थक मात्र होइन, फरक राजनीतिक धारका नागरिकले समेत सकारात्मक रूपमा लिइरहेका छन्। चुनाव जितेपछि शक्ति प्रदर्शन र उत्सव मनाउने परम्पराभन्दा फरक शैली अपनाउँदै जिम्मेवारीतर्फ उन्मुख हुने उनको घोषणालाई नयाँ राजनीतिक संस्कारको संकेतका रूपमा समेत हेरिएको छ।
विशेषगरी युवा मतदाता र सामाजिक सञ्जाल प्रयोगकर्ताबीच शाहको निर्णयले व्यापक चर्चा पाएको छ। धेरैले यसलाई “विजयभन्दा सेवा र कामलाई प्राथमिकता दिने नयाँ राजनीतिक सन्देश” का रूपमा व्याख्या गरेका छन्।
