छात्रवृत्तिबाट बदलिएको जीवन, ‘घण्टी’मा खनियो कर्णालीका १९ वर्षीय युवाको भरोसा

काठमाडौं — प्रतिनिधिसभा सदस्य निर्वाचनको मतपरिणामसँगै देशभर देखिएको ‘घण्टी लहर’का पछाडि विभिन्न व्यक्तिगत अनुभव र आशाहरू पनि जोडिएका देखिन्छन्। कर्णालीका एक १९ वर्षीय युवाले आफ्नो जीवनमा आएको परिवर्तन सम्झिँदै यसपटक आफूले किन ‘घण्टी’मा मतदान गरेको भन्ने कारण खुलाएका छन्।

ती युवाका अनुसार माध्यमिक शिक्षा परीक्षा (SEE) पछि उच्च शिक्षा अध्ययनका लागि काठमाडौं आउने उनको ठूलो सपना थियो। तर परिवारको कमजोर आर्थिक अवस्थाका कारण त्यो सपना अधुरै रहने जस्तो देखिन्थ्यो।

“SEE पछि काठमाडौंमा पढ्न मन थियो। तर घरको आर्थिक अवस्थाले सम्भव थिएन,” उनले भने, “त्यही बेला एक दिन काठमाडौं महानगरपालिकाले निकालेको छात्रवृत्तिको सूचना देखेँ। मैले फर्म भरेँ र परीक्षा दिएँ। भनसुन गर्ने मेरो कोही थिएन। तर अचम्म — मेरो नाम निस्कियो।”

उनका अनुसार त्यसपछि उनी नयाँ बानेश्वरस्थित एक प्रतिष्ठित कलेजमा भर्ना हुन सफल भए, जहाँ दुई वर्षको अध्ययन खर्च करिब पाँच लाख रुपैयाँ पर्ने रहेछ। छात्रवृत्तिको अवसरले उनको शैक्षिक यात्रा सम्भव भएको उनले बताए।

“काठमाडौका मेयर हुँदा कुनै भनसुन वा सोर्सफोर्सबिनै मजस्ता हजारौं गरिबका छोराछोरीलाई राम्रो स्कुल–कलेजमा पढ्ने अवसर दिने बालेनले प्रधानमन्त्री बनेपछि पनि देशका लागि राम्रो गर्नेछन् भन्ने विश्वास लाग्यो,” उनले भने।

यही विश्वासका कारण उनले परिवारको परम्परागत राजनीतिक झुकावलाई समेत परिवर्तन गर्दै ‘घण्टी’ चुनाव चिन्हमा मतदान गरेको बताए। “मैले मात्र होइन, बा–आमालाई पनि घण्टीमै भोट हाल्न लगाएँ,” उनले थपे।

उक्त अनुभवले स्थानीय सरकारमार्फत लागू गरिएको छात्रवृत्ति कार्यक्रमले प्रत्यक्ष रूपमा धेरै विद्यार्थीको जीवनमा परिवर्तन ल्याएको देखाउँछ। उपलब्ध तथ्यांकअनुसार काठमाडौं महानगरपालिकाले लागू गरेको छात्रवृत्ति सम्बन्धी कानुन कार्यान्वयन भएपछि पछिल्ला तीन वर्षमा ५२ हजार २८२ विद्यार्थीले करिब २ अर्ब २५ करोड रुपैयाँ बराबरको छात्रवृत्ति सुविधा प्राप्त गरेका छन्।

विश्लेषकहरूका अनुसार यस्ता नीतिगत कार्यक्रमले प्रत्यक्ष लाभ पाएका युवाहरूबीच विश्वास र समर्थनको आधार निर्माण गर्ने भएकाले हाल देखिएको ‘घण्टी लहर’को एक कारण यस्तै अनुभवहरू पनि हुन सक्ने बताइन्छ।